Hæstiréttur staðfesti í dag dóm Héraðsdóms Reykjavíkur um að rekstrarleyfi hverfisbarsins Gullaldarinnar í Grafarvogi yrði ekki afturkallað.

Maður sem býr á 3. hæð í sama húsi og Gullöldin er staðsett hafði farið fram á að felld yrði úr gildi ákvörðun sýslumannsins í Reykjavík um að veita staðnum áframhaldandi rekstrarleyfi.

Sagði maðurinn að aðstandendur Gullaldarinnar hefðu sótt of seint um endurnýjun leyfisins og með þeim rökum að nýtt aðalskipulag borgarinnar hafi verið samþykkt fyrir árin 2010 til 2030. Maðurinn sagði að veitingarekstur staðarins hafi valdið sér verulegu ónæði í gegnum tíðina.

Í dómi Hæstaréttar og héraðsdóms segir að Gullöldin hafi ekki sótt um breytingu á aðalskipulagi heldur áframhaldandi rekstrarleyfi. Að sama skapi var ekki fallist á að staðurinn hafi sótt of seint um rekstrarleyfi.

Gullöldin er hverfisbar í Grafarvogi sem býður upp á mat, drykki, lifandi tónlist og sýnir frá íþróttaviðburðum.

Dóm Hæstaréttar og héraðsdóm má lesa hér.