Guðný Arna kemur til Össurar frá Kviku banka og dótturfélögum þar sem hún hefur starfað síðastliðið ár í fjármálatengdum störfum.

Hún starfaði í 10 ár fyrir lyfjafyrirtækið Teva/Actavis bæði í Sviss og í Bandaríkjunum, meðal annars sem fjármálastjóri samheitalyfjaþróunar. Guðný Arna vann hjá Kaupþingi á árunum 2001-2008, meðal annars sem fjármálastjóri. Einnig hefur hún starfað hjá Eimskip og PWC í Stokkhólmi.

Hún lauk Cand.oecon. í reikningsskilum og endurskoðun frá Háskóla Íslands árið 1991 og meistaranámi í reikningsskilum og fjármálum frá háskólanum í Uppsala árið 1996.

Guðný Arna tekur við starfinu af Sveini Sölvasyni sem tók nýlega við sem forstjóri félagsins.

„Guðný Arna er reynslumikill stjórnandi með víðtæka reynslu af fjármálastjórn í alþjóðlegu umhverfi. Hún bætist við framúrskarandi hóp starfsmanna sem leggur áherslu á árangursdrifna teymisvinnu og það er mjög ánægjulegt að fá hana til liðs við okkur,“ segir Sveinn Sölvason forstjóri Össurar hf.