Undirritun yfirlýsingarinnar fer fram hjá Norðuráli á Grundartanga. Jafnframt munu forsvarsmenn Elkem, Norðuráls og sveitarfélaganna flytja stutt erindi.

Í uppbyggingunni felst að mótuð verður fyrirmyndar sjálfbærniumgjörð fyrir svæðið og unnið að uppbyggingu hringrásarhagkerfis með bættri fjölnýtingu auðlinda og innviða. Verndari verkefnisins er Guðlaugur Þór Þórðarson, umhverfis-, orku- og loftslagsráðherra.

Lágmörkun umhverfisáhrifa og aukin hagsæld

Fyrir liggur greining KPMG á tækifærum Grundartanga sem græns iðngarðs með hringrásarhugsun og leiðir hún í ljós mikla möguleika Grundartanga á þessu sviði. Áætlað er að ávinningur vegferðarinnar sé margþættur fyrir hagaðila svæðisins og muni skila sér m.a. í lágmörkun umhverfisáhrifa og betri nýtingu hráefna. Einnig mun hún styrkja samkeppnisstöðu Grundartanga sem atvinnusvæðis og þannig auka hagsæld ásamt því að styðja við aðgerðaáætlanir stjórnvalda í loftslagsmálum.

Leiðandi á heimsvísu

Grundartangi sem grænn iðngarður stefnir á að verða leiðandi á heimsvísu enda eru allar forsendur til staðar. Meðal verkefna framundan er stofnun samstarfsklasa aðilanna á Grundartanga og annarra hagaðila og fjölnýtingaverkefni s.s. stofnun hitaveitu sem nýtt getur varma frá Elkem og Norðuráli.

Stærsta iðnaðarsvæði Vesturlands

Á Grundartanga er góð hafnaraðstaða og þar er langstærsta iðnaðarsvæði Vesturlands þar sem starfa um 1.100 manns að jafnaði auk þess sem rekja má um 1.000 afleidd störf til starfsemi svæðisins.

Dagskrá fundarins 11. maí á Grundartanga er eftirfarandi:

Setning fundar og kynning á Grundartanga – grænum iðngarði með hringrásarhugsun
Ólafur Adolfsson, stjórnarformaður Þróunarfélags Grundartanga

Grænir iðngarðar og stefna stjórnvalda
Guðlaugur Þór Þórðarson, Umhverfis- orku- og loftslagsráðherra

Möguleikar græns iðngarðs á Grundartanga
Sigrún Helgadóttir, Norðurál

Hringrásarhugsun á Grundartanga
Sædís Alexía Sigurmundsdóttir, Elkem

Grundartangi sem fyrirmynd grænna iðngarða
Sævar Freyr Þráinsson, bæjarstjóri Akraness

Mikilvægi Grundartanga sem atvinnusvæði
Linda Björk Pálsdóttir, sveitarstjóri Hvalfjarðarsveitar

Grundartangi og græn vegferð Reykjavíkur
Þorsteinn Gunnarsson, borgarritari

Undirritun viljayfirlýsingar um uppbyggingu Grundartanga – græns iðngarðs með hringrásarhugsun.