Heildarfjöldi greiddra gistinátta í apríl síðastliðnum dróst saman um 96 prósent borið saman við apríl í fyrra, að sögn Hagstofu Íslands. Þar af fækkaði gistinóttum á hótelum um 97 prósent og um 93 prósent á gistiheimilum. Þá var 93 prósenta fækkun á öðrum tegundum gististaða, svo sem farfuglaheimilum, orlofshúsum og svo framvegis.

Þetta kemur fram í nýrri frétt á vef Hagstofunnar.

Greiddar gistinætur ferðamanna á öllum gististöðum voru um 20.800 í apríl en þær voru um 519.000 í sama mánuði árið áður. Um 68 prósent gistinátta voru skráðar á Íslendinga, eða um 14.200, en um 32 prósent á erlenda gesti eða um 6.600 nætur. Gistinætur á hótelum og gistiheimilum voru um 13.500, þar af 9.200 á hótelum. Gistinætur á öðrum tegundum gististaða voru um 7.300.

„Skyndileg fækkun brottfara frá Keflavíkurflugvelli olli því að ekki náðist að safna úrtaki fyrir framkvæmd landamærarannsóknar Ferðamálastofu og Hagstofu Íslands í apríl. Af þeim sökum reyndist ekki unnt að áætla fjölda gistinátta erlendra ferðamanna utan hefðbundinnar gistináttaskráningar í apríl, þ.e. á stöðum sem miðla gistingu gegnum Airbnb og svipaðar síður, í bílum utan tjaldsvæða eða innandyra þar sem ekki var greitt sérstaklega fyrir gistingu.

Ráðgert er að hefja áætlun á gistinóttum erlendra ferðamanna utan hefðbundinnar gistináttaskráningar að nýju þegar framkvæmd landamærarannsóknar kemst aftur í fyrra horf,“ segir jafnframt í frétt Hagstofunnar.

Í lok mars tóku mörg hótel þá ákvörðun að loka tímabundið og voru 75 hótel lokuð í apríl. Framboð gistirýmis minnkaði um 44,6 prósent frá apríl 2019, mælt í fjölda hótelherbergja, sem skýrist af lokunum hótela.

Herbergjanýting á hótelum í apríl síðastliðnum var 3,5 prósent og dróst saman um 45,7 prósentustig frá fyrra ári.