Heildarfjöldi greiddra gistinátta í október síðastliðnum dróst saman um 91% samanborið við október 2019. Þar af fækkaði gistinóttum á hótelum um 91%, um 86% á gistiheimilum og um 88% á öðrum tegundum gististaða á borð við farfuglaheimili og orlofshús.

Þetta kemur fram í nýjum tölum á vef Hagstofunnar. Þar segir að ekki hafi verið unnt að áætla fjölda erlendra gistinátta sem bókaðar voru í gegnum Airbnb þar sem landamærarannsókn Ferðamálastofu og Hagstofu Íslans liggi niðri vegna mikillar fækkunar brottfara frá Keflavíkurflugvelli. Voru þær um það bil 123 þúsund í október í fyrra.

Á 12 mánaða tímabili, frá nóvember 2019 til október 2020, var heildarfjöldi gistinátta á hótelum um 2.080.000 sem er 54% fækkun miðað við sama tímabil árið áður.
Mynd/Hagstofa Íslands

Framboð hótelherbergja á landinu minnkaði um 33% samanborið við október 2019. Herbergjanýting á hótelum var 10,9% og dróst saman um 58 prósentustig frá fyrra ári.

Mikill samdráttur í hótelgistingu var á milli ára í öllum landshlutum en mestur á höfuðborgarsvæðinu þar sem gistinóttum fækkaði úr 225.200 í 14.000 á milli ára eða um 94%.

Greiddar gistinætur ferðamanna á öllum gististöðum voru um 69.000 í október en þær voru um 779.000 í sama mánuði árið áður. Um 65% gistinátta voru skráðar á Íslendinga, eða um 45.000, en um 35% á erlenda gesti eða um 24.000 nætur. Gistinætur á hótelum og gistiheimilum voru um 52.000, þar af 38.800 á hótelum.

Gistinætur erlendra ferðamanna á hótelum í október drógust saman um 97% á milli ára en íslenskum gistinóttum fækkaði um 32%. Gistinætur Íslendinga voru 27.000, eða 70% af hótelgistinóttum, á meðan erlendar gistinætur voru 11.800 eða 30%.