Þetta þýðir að einstaklingar og fyrirtæki á Íslandi geta nú með einföldum hætti sannreynt gildi rafrænna undirskrifta og innsigla og verið sannarlega viss um nákvæmni niðurstaðanna að sögn Ólafs Páls Einarssonar, framkvæmdastjóra Dokobit á Íslandi. Fyrirtækið þjónustar meðal annars Landsbankann, Íslandsbanka, Landsvirkjun, KPMG, Origo, Creditinfo, íslensk ráðuneyti og fleiri aðila.

Samkvæmt eIDAS reglugerðinni, sem fjallar um réttaráhrif rafrænna undirskrifta í Evrópu, er staðfesting viðbótarþjónusta fyrir rafrænar undirskriftir og innsigli. Ólafur Páll segir að með staðfestingarþjónustunni sé hægt að sannreyna gildi rafrænna undirskrifta og innsigla frá því þær voru gerðar þar til sannreyningin er framkvæmd. Dokobit hefur farið í gegnum strangt vottunarferli til að geta boðið upp á þessa þjónustu.

Hægt að nota sem sönnunargagn fyrir dómstólum

„Í þessum hraða vexti á rafrænum undirskriftum er staðfestingarþjónusta farin að verða álíka nauðsynleg þjónusta þar sem við þurfum að geta sannreynt gildi rafrænna undirskrifta í skjölunum sem við tökum við. Ef við gerum það ekki getum við ekki verið viss um að undirskriftirnar eða innsiglin í skjölunum séu í lagi og að skjalið sjálft sé gilt. Það er mikill munur á því að nota staðfestingarþjónustu sem er fullgild sem þýðir að óháður samræmismatsaðili er búinn að votta þjónustuna og staðfesta að öllum viðeigandi ETSI og eIDAS kröfum sé fylgt ítarlega. Niðurstöðurnar eru þannig áreiðanlegar og hafa hærri réttaráhrif heldur en ef staðfestingarþjónusta sem er ekki fullgild er notuð. Hægt er að nota staðfestingarskýrslu úr kerfi okkar sem sönnunargagn fyrir dómstólum þar sem hún sýnir gildi undirskriftanna,“ segir Ólafur Páll.