Lífeyrissjóðurinn Gildi og sjóður á vegum Stefnis, sjóðastýringarfyrirtækis Arion banka, ásamt norskum fjárfesti eru hornsteinafjárfestar í hlutafjárútboði Arnarlax, fiskeldis á Vestfjörðum. Að því loknu er stefnt að skráningu félagsins á Merkur-markaðinn í kauphöllinni í Osló.

Hlutafjárútboðið hófst í morgun og lýkur á morgun. Horft er til þess að Arnarlax safni um 432 milljónum norskra króna í hlutafjárútboðinu, jafnvirði 6,5 milljarða íslenskra króna. Fyrirtækjaráðgjöf Arion banka er á meðal söluráðgjafa í útboðinu, að því er fram kemur í tilkynningu til kauphallarinnar í Osló.

Gildi mun fjárfesta í hlutafjárútboðinu fyrir um 216 milljónir norskra króna, jafnvirði 3,3 milljarða íslenskra króna og mun ekki fá minna úthlutað en 194,4 milljónum norskra króna.

Sjóður Stefnis mun fjárfesta fyrir 97,2 milljónir norskra króna, jafnvirði 1,5 milljarða króna, og mun ekki fá minna úthlutað en 77,7 milljónir króna.

Edvin Austbø mun fjárfesta fyrir 32,4 milljónir norskra króna, jafnvirði tæplega 500 milljóna íslenskra króna og mun ekki fá minna úthlutað en 21,6 milljónum norskra króna.

Sömuleiðis er stefnt að því að núverandi hluthafar selji fyrir um 147 milljónir noskra króna, jafnvirði 2,2 milljarða íslenskra króna. Gyða, sem er í eigu Kjartans Ólafssonar, stjórnarformanns Arnarlax, á 4,8 prósent í laxeldinu og mun selja 22 prósent af eign sinni. Pactum AS, sem á 6,8 prósenta hlut í Arnarlaxi mun selja 55 prósent af eign sinni.

Kjartan Ólafsson, stjórnarformaður Arnarlax.
Fréttablaðið/Stefán Karlsson

Arnarlax var fyrir tæpu ári skráð á NOTC-lista kauphallarinnar í Osló fyrir minni fyrirtæki. Kjartan Ólafsson, formaður stjórnar Arnarlax, sagði við Morgunblaðið að sú skráning hafi reynst félaginu og hluthöfum þess vel. Merkur-markaðurinn geri meiri kröfur til félags­ins um upplýsingagjöf og veiti fjárfestum betri umgjörð. Hlutabréf sem þar eru skráð höfði til breiðari hóps fagfjár­festa. Stærri og þróaðri fjárfestar líti meira til þess markaðar, ekki síst í vaxtarfyrirtækjum í blágræna hagkerfinu.

Stærsti hluthafi Arnarlax fyrir hlutfjárútboðið var norski laxeldisrisinn SalMar með 59 prósenta hlut.