Íslenski sprotinn LifeSwap tekur þátt í viðskiptahraðlinum Techstar í Seattle um þessar mundir. Í tilkynningu segir að Techstars sé einn virtast hraðall í heimi og að LifeSwap sé fyrsta íslenska fyrirtækið til að vera valið til þátttöku.

Fyrirtæki á borð við Uber, Twillio og SendGrid hafa farið í gegnum Techstar viðskiptahraðalinn. „Þess má geta að einungis 1-2 prósent fyrirtækja sem sækja um komast inn. Það er lægra hlutfall heldur en hjá virtustu skólum Bandaríkjanna eins og Harvard og Yale. Með þátttökunni þá fær LifeSwap aðgang að tengslaneti Techstar, fer í gegnum ferli til þess að örva vöxt fyrirtækisins auk þess að fá fjármagn frá hraðlinum. Jafnframt þá sótti LifeSwap fjármagn hjá íslenskum engla fjárfestum, en umfram eftirspurn var eftir hlutum í félaginu,“ segir í tilkynningunni.

LifeSwap var stofnað sumarið 2021 og vinnur að því að umbylta ferðaþjónustumarkaðnum. Lausnin hjálpar ferðamönnum að ferðast eins og heimamenn með því að gera fólki kleift að starfa sem sjálfstæðir ferðaumboðsmenn á einfaldan og skalanlegan máta.

„Við höfum sjálfir kynnst því sem ferðamenn að það er allt of tímafrekt að skipuleggja frí á nýjan áfangastað,“ segir Bjarki Benediktsson, stofnandi og framkvæmdastjóri LifeSwap. „Það kom okkur á óvart hvað rosalega margir tengdu við þetta vandamál en nýjar rannsóknir sýna að 92 prósent af fólki finnst yfirþyrmandi að fara í þessa vinnu í ljósi þess hversu margir valmöguleikar eru af afþreyingu, gististöðum og öðrum valkostum í boði í dag.“

„Það sem við komumst einnig að er að um 50 prósent af ferðamönnum sem glíma við þetta vandamál eru tilbúnir að borga fyrir aðstoð, en ekki af hverjum sem er,“ bætir Bjarki Benediktsson við „Þeir vilja kaupa þjónustu beint af heimamanni sem lifir lífstíl sem þau tengja við“.

Á meðal fyrstu notenda að lausninni eru ferðaáhrifavaldar, bæði stórir sem og smáir, sem vilja veita framúrskarandi þjónustu fyrir sína fylgjendur og fanga meira af virðinu sem þau skapa fyrir ferðaþjónustu markaðinn. Undanfarin ár hefur kauphegðun breyst frá hefðbundnum ferðaskrifstofum yfir á internetið og núna inn á samfélagsmiðla þar sem ferðamenn leita að innblæstri og ráðum frá frá fólki sem það samsvarar sér með.

„Sem bæði meðstofnandi á íslensku félagi og fjárfestir í íslenskum tæknifyrirtækjum síðan 2006, þá er ég gríðarlega spenntur fyrir að bjóða LifeSwap í Techstars Seattle hraðalinn.“ segir Isaac Kato, framkvæmdastjóri Techstar Seattle. „Það eru risastór tækifæri í því að í tengja saman efnisköpunar/áhrifavalda hagkerfið (e. creator economy) og stafræna ferðaþjónustumarkaðinn. LifeSwap teymið eru réttu aðilarnir í það og er Ísland fullkominn tilraunamarkaður fyrir hugmyndina áður en þeir skala hana til allra heimshorna.“