Í tilkynningu sem Nasdaq Iceland sendi frá sér um uppfærsluna segir Bjørn Sibbern, forstjóri evrópskra markaða hjá Nasdaq að íslenski hlutabréfamarkaðurinn hafi verið í vexti undanfarin ár. „Færsla upp í flokk nýmarkaðsríkja er vísbending um þá tiltrú sem ríkir um áframhaldandi vöxt. Hún gæti aukið enn frekar áhuga á íslenska hlutabréfamarkaðnum og efnahagslífi og skapað ný tækifæri fyrir fyrirtæki og fjárfesta. Ég óska Nasdaq Iceland og viðskiptavinum okkar til hamingju með þennan mikilvæga áfanga.“

Samkvæmt tilkynningunni hefur Nasdaq Iceland, ásamt Nasdaq verðbréfamiðstöð, viðskiptavinum, Seðlabanka Íslands, ríkisstjórn og öðrum hagsmunaaðilum, unnið ötullega að því að bæta íslenska fjármálamarkaðinn, sem hefur leitt til umbóta í regluverki og uppgjöri viðskipta til samræmis við alþjóðlegar kröfur. Uppfærsla Íslands í flokk með nýmarkaðsríkjum mun greiða fyrir innflæði verulegs fjármagns inn í íslenskt efnahagslíf sem getur stutt við fjármögnunarmöguleika skráðra fyrirtækja.

„Þetta eru gríðarlega stór tímamót fyrir íslenska hlutabréfamarkaðinn og afar góðar fyrir fréttir fyrir efnahagslífið,“ segir Magnús Harðarson, forstjóri Nasdaq Iceland. „Ákvörðun FTSE er viðurkenning á því gríðarmikla starfi sem markaðsaðilar hafa lagt af mörkum til að styrkja íslenska markaðinn innan hins alþjóðlega fjármálamarkaðar.

Mikilvægar skráningar fyrirtækja undanfarin ár, aukinn seljanleiki og ýmsar aðrar umbætur á markaði hafa jafnt og þétt aukið áhuga innlendra og alþjóðlegra fjárfesta og nú leitt til þessarar ánægjulegu niðurstöðu.“

Ný flokkun FTSE Russell í „Secondary Emerging“ markaði fyrir Ísland tekur gildi við opnun markaða, mánudaginn 19. september, 2022.

Hér fyrir neðan má sjá þau íslensku félög sem ráðgert er að verði tekin inn í vísitölu nýmarkaðsríkja: