Friðbert Friðbertsson, forstjóri Heklu, hefur eignast bílaumboðið að fullu. Fyrir kaupin átti hann helming í fyrirtækinu.

Félag Friðberts, Ritfún, keypti 50 prósenta hlut af Semler, sem á og rekur umboð fyrir Volkswagen bifreiðar í Danmörku (Volkswagen, Audi, Porsche, SEAT og Skoda), að því er segir í tilkynningu. Fyrir átti Friðbert sinn hlut í Heklu í gegnum Riftún.

„Breytt eignarhald hefur verið til skoðunar um nokkurt skeið hjá okkur og það rímaði vel við framtíðarsýn Semler sem ætlar að einbeita sér enn frekar að danska markaðnum. Semler, sem hefur átt hlut í félaginu síðan 2013, hefur verið góður samstarfsfélagi og þetta hefur verið ánægjulegur tími,“ segir Friðbert í tilkynningu.

„Framundan eru mjög spennandi tímar hjá fyrirtækinu, en Hekla hefur kynnt til sögunnar fjölmargar tegundir rafbíla sem hafa fengið afar góðar viðtökur. Á næsta ári munu nýir rafbílar bætast í hópinn og margar áhugaverðar nýjungar líta dagsins ljós. Ísland er leiðandi í innleiðingu rafbíla og sá reynslumikli og öflugi hópur sem starfar hjá fyrirtækinu er reiðubúinn til að takast á við nýja tíma. Ég er stoltur af þeim góða árangri sem félagið hefur náð á erfiðum tímum og ég er sannfærður um að með þessu skrefi verði félagið áfram leiðandi í sölu og þjónustu bifreiða,“ segir Friðbert.

Lögfræðistofan Landslög og fyrirtækjasvið Arion banka voru ráðgefandi í ferlinu og viðskiptunum sjálfum.

Tveir danskir fulltrúar Semler hafa vikið úr stjórn Heklu og inn stígur Friðbert. Fyrir í stjórn voru Jón Eiríksson, sem er nýkjörinn stjórnarformaður, og Margrét Guðmundsdóttir.

Hekla velti 12,5 milljörðum króna árið 2019 samanborið við 17 milljarða króna árið áður. Bílaumboðið tapaði 22 milljónum króna fyrir skatta árið 2019 og 31 milljón króna árið 2018 fyrir skatta. Eigið Heklu var 1,6 milljarðar króna við árslok 2019 og eiginfjárhlutfallið 38 prósent.

Eignir Riftúns voru bókfærðar á 258 milljónir króna árið 2019. Friðbert eignast helmingshlut í Heklu árið 2011.