Um átta af hverjum tíu hafa heyrt um ákvörðun sem tekin var af samkeppnisyfirvöldum og nær allir nefna Samkeppniseftirlitið í því samhengi. Í könnun ESB höfðu fimm af hverjum tíu heyrt um ákvörðun samkeppnisyfirvalda. Þetta kemur fram í tilkynningu frá Samkeppniseftirlitinu.

Dagana 30. apríl til 3. maí 2019 framkvæmdi MMR könnun, að beiðni Samkeppniseftirlitsins, um viðhorf almennings til samkeppnisstefnu stjórnvalda og samkeppni í tilteknum atvinnugeirum. Könnunin er sambærileg könnun sem framkvæmdastjórn ESB lét framkvæma í öllum aðildarríkjum sínum. Gefur hún því færi á samanburði við viðhorf almennings í aðildarríkjum ESB.

Niðurstöður könnunarinnar benda til þess að íslenskir neytendur séu mjög meðvitaðir um mikilvægi virkrar samkeppni og samkeppniseftirlits.

97 prósent svarenda telja virka samkeppni hafa jákvæð áhrif á sig sem neytendur. Þetta er hærra hlutfall en í nokkru ESB-landanna og afgerandi hærra en að meðaltali í ESB ríkjunum, en þar svöruðu 83 prósent því til að virk samkeppni hefði jákvæð áhrif á sig sem neytendur.

Íslendingar verða mest varir við samkeppnisvandamál í farþegaþjónustu (42 prósent), fjármálaþjónustu (33 prósent) og á matvörumarkaði (24 prósent). Í könnun ESB nefna hins vegar flestir síma- og netþjónustu (27 prósent), orkumarkað og lyfjamarkað.

Könnuninni svaraði 941 einstaklingur og voru niðurstöðurnar vigtaðar með tilliti til aldurs, kyns, búsetu og menntunar.