Félag kvenna í atvinnulífinu kallar eftir tilnefningum fyrir FKA Viðurkenningahátíðina sem haldin verður þann 20. janúar 2022 á Grand Hótel Reykjavík. Hægt er að tilnefna á heimasíðu FKA til og með 25. nóvember næstkomandi.

FKA Viðurkenningarhátíðin er haldin árlega þar sem konur úr atvinnulífinu eru heiðraðar og verða viðurkenningar veittar í þremur flokkum:

  • FKA viðurkenningin
  • FKA þakkarviðurkenningin
  • FKA hvatningarviðurkenningin

„Það er mikilvægt að beina kastaranum að flottum fyrirmyndum, fjölbreytileika og fá nöfn af fjölbreyttum hópi kvenna á lista og nöfn kvenna af öllu landinu, sem dómnefnd mun vinna með og á endanum velja þær konur sem verða heiðraðar af FKA í janúar 2022," segir í tilkynningu frá FKA.

Í dómnefnd munu sitja sjö aðilar og var áhersla lögð á fjölbreyttni við val á dómurum.

„Við skipan dómnefndar Viðurkenningarhátíðar FKA er leitast við að einstaklingar hafi sem breiðastan bakgrunn í aldri, reynslu, búsetu og uppruna. Það er í fullu samræmi við stefnu FKA í víðasta skilningi orðsins og eina vitið ef við ætlum að beina kastaranum að ólíkum konum um land allt,“ segir Andrea Róbertsdóttir framkvæmdastjóri FKA.

Formaður dómnefndar 2022 er Hulda Ragnheiður Árnadóttir forstjóri Náttúruhamfaratrygginga Íslands og fyrrverandi formaður FKA.

Í dómnefnd með Huldu Ragnheiði eru þau, í stafrófsröð:

  • Gunnlaugur Bragi Björnsson, samskiptastjóri Viðskiptaráðs.
  • Hermann Björnsson, forstjóri Sjóvá.
  • Jón Þorgrímur Stefánsson, forstjóri NetApp á Íslandi SVP & Global CTO.
  • Tanya Zharov, aðstoðarforstjóri Alvotech.
  • Unnur Elva Arnardóttir, forstöðumaður hjá Skeljungi, varaformaður FKA og fulltrúi stjórnar FKA vegna viðurkenningarhátíðarinnar 2022.
  • Veiga Grétarsdóttir, kayakræðir, fyrirlesari, leiðsögukona og umhverfissinni.