Alþjóðlegu bankasamsteypurnar Groupe BPCE, Grupe Crédito Agrícola og UniCredit hafa ásamt núverandi fjárfestum Frumtak Ventures, Velocity Capital og Industrifonden fjárfest í íslenska fjártæknifyrirtækinu Meniga fyrir um 1,3 milljarða íslenskra króna. Þetta kemur fram í fréttatilkynningu frá félaginu.

Meniga, sem er leiðandi fyrirtæki á heimsvísu í stafrænni bankaþjónustu, mun notfæra fjárfestinguna til þess að styðja við áframhaldandi vöxt fyrirtækisins í rannsóknum og þróun á hugbúnaði ásamt því að styðja við sölu og þjónustu fyrirtækisins til þess að mæta aukinni eftirspurn. Bankarnir þrír eru jafnframt meðal viðskiptavina Meniga.

„Við erum gríðarlega ánægð með að bjóða Groupe BPCE og Crédito Agrícola velkomna í hluthafahóp Meniga. Það er stefna okkar að vinna náið með viðskiptavinum okkar í þróun á starfrænni bankaþjónustu og að fá þessa banka inn sem fjárfesta er kjörin leið til að styrkja slíkt samstarf. Við þökkum það traust sem við höfum fengið til að byggja með þeim bankaþjónustu framtíðarinnar,“ er haft eftir Georg Lúðvíkssyni, forstjóra og einum af stofnendum Meniga, í tilkynningunni.

Groupe BPCE, næst stærsta bankasamsteypa í Frakklandi, er með um 36 milljón viðskiptavini, Grupo Crédito Agrícola, einn stærsti banki Portúgal, er með 1,5 milljón viðskiptavini og UniCredit starfar í 13 löndum íEvrópu og eru með starfsemi í 18 löndum til viðbótar víðsvegar um heiminn, eftir því sem fram kemur í fréttatilkynningunni. Unicredit hafði áður fjárfest í Meniga árið 2018.

„Samstarf okkar við Meniga hefur verið á jákvæðum nótum frá byrjun. Saman höfum við lagt grunninn að áframhaldandi stafrænni þróun Groupe BPCE sem mun gera okkur kleift að veita viðskiptavinum okkar enn betri þjónustu á tímum mikilla tækniframfara í bankaþjónustu. Við hlökkum til að umbreyta notendaupplifun bankans og leggja okkar að mörkum í framtíð stafrænnar þróunnar með Meniga,“ segir Yves Tyrode, framkvæmdarstjóri upplýsinga og stafrænnar þróunnar og meðlimur framkvæmdarstjórnar Groupe BPCE.