Japanska lyfjafyrirtækið Fuji Pharma hefur fjárfest í Alvotech fyrir 50 milljónir Bandaríkjadala, jafnvirði um 6,2 milljarða króna en um er að ræða 4,2 prósenta eignarhlut í fyrirtækinu. 

Þetta kemur fram í fréttatilkynningu en Alvotech og Fuji Pharma tilkynntu nýlega um samstarf þar sem það fyrrnefnda þróar og framleiðir lífæknilyf fyrir Japansmarkað, sem er þriðja stærsta markaðssvæði heims. Róbert Wessman, stofnandi Alvotech, segir ánægjulegt að fá nýjan fjárfesti í öflugan hóp hluthafa fyrirtækisins.

Fjárfesting Fuji Pharma nú styður við okkar framtíðarplön, en er ekki síður til marks um þá trú sem erlendir fjárfestar hafa á fyrirtækinu. Framundan eru spennandi tímar hjá Alvotech. Klínískar rannsóknir Alvotech eru að hefjast og fyrirtækið er vel fjármagnað til frekari vaxtar og bakland fyrirtækisins er traust,“ segir Róbert.

Hirofumi Imai, stjórnarformaður Fuji Pharma, segir í tilkynningu til Kauphallar í Tókýó að hann sé áhugasamur um að koma inn sem nýr fjárfestir í Alvotech, sem hafi vaxið hratt á undanförnum árum. Hann segist einnig hafa mikla trú á þróunarstarfi fyrirtækisins og framleiðslugetu og bíði þess með eftirvæntingu að taka sæti í stjórn Alvotech.

Stærstu hluthafar Alvotech eru Aztiq Pharma AB, Alvogen og Fuji Pharma. Róbert Wessman, forstjóri Alvogen og stofnandi Alvotech, leiðir hóp fjárfesta í gegnum fjárfestingafélagið Aztiq AB, sem er meirihlutaeigandi í Alvotech. Stærstu eigendur Alvogen eru tveir af stærstu fjárfestingasjóðum í heiminum í dag, CVC Capital Partners og Temasek, ásamt Astiq Pharma undir forrystu Róberts.