Í ágúst jókst innlend kortavelta Íslendinga í fataverslunum að raunvirði um 14 prósent á milli ára sem er mesti vöxtur á meðal undirliða verslunar milli tímabila. „Færri utanlandsferðir gætu haft hér áhrif þar sem landsmenn eru ef til vill að kaupa í auknum mæli föt hér á landi sem annars hefðu verið keypt í verslunarferðum erlendis,“ segir í Hagsjá Landsbankans.

Það hefur hægst verulega á kortaveltu Íslendinga og benda gögn Seðlabankans til þess að samdráttur milli ára í ágúst sé sá mesti síðan í júní 2013. Fram kemur í tilkynningu Rannsóknaseturs verslunarinnar að innlend hafi staðið í stað að nafnvirði í ágúst. Þegar verðbólga er tekin með í reikninginn er um samdrátt að ræða.

„Minna viðhald bifreiðar er ef til vill vísbending um að bílaflotinn sé að yngjast.“

Dregur úr útgjöldum tengdum bílum

Ef litið er til breytinga frá því í ágúst í fyrra hefur velta dregist hlutfallslega mest saman í þeim lið sem tengist bifreiðum, sum sé kaupum á eldsneyti og viðgerðarþjónustu bifreiða, eða alls um 13 prósent að raunvirði. Eldsneytiskaup drógust saman um þrjú prósent en viðgerðir og viðhald bifreiða um 24 prósent. „Minna viðhald bifreiðar er ef til vill vísbending um að bílaflotinn sé að yngjast,“ segir í Hagsjá.

Aðrir liðir sem drógust einnig saman í ágúst, þó ekki jafn mikið, voru útgjöld til verslunar og þjónustu. Mesti samdráttur einstakra undirliða verslunarinnar var í tollfrjálsri verslun sem dróst saman um 7 prósent að raunvirði milli ára í ágúst. „Þetta kemur ekki á óvart þar sem brottfarir Íslendinga um Leifsstöð í ágústmánuði voru 14 prósent færri en á sama tíma fyrir ári síðan og má gera ráð fyrir að megnið af tollfrjálsri verslun fari fram á Keflavíkurflugvelli,“ segir í Hagsjá Landsbankans.