Tryggingamiðstöðin hefur gefið út afkomuviðvörun vegna óvæntrar og verulegrar niðurfærslu á gengi fasteignasjóðs, og vegna verri afkomu af hlutabréfum.

Í tilkynningu frá Tryggingamiðstöðinni segir að samkvæmt fyrirliggjandi tölum sé ljóst að ávöxtun af verðbréfaeign félagsins verði talsvert verri
en spá fyrir þriðja ársfjórðung gerir ráð fyrir. Spáin gerir ráð fyrir að fjárfestingatekjur og aðrar tekjur muni nema 215 milljónir króna en miðað við núverandi raunstöðu verða fjárfestingatekjur og aðrar tekjur neikvæðar á þriðja ársfjórðungi á bilinu 225-275 milljónir.

„Langstærsti hluti fráviksins skýrist af óvæntri og verulegri niðurfærslu á gengi fasteignasjóðs, en einnig er verri afkoma af hlutabréfum og hlutabréfasjóðum sem skýrist af lækkunum á markaði frá því að spáin var gefin út. Þar sem fjórðungurinn er ekki á enda þá er enn nokkur óvissa í framangreindum tölum,“ segir í tilkynningunni.

Uppgjör fyrir ársfjórðunginn verður birt þann 23. október og samhliða verður birt uppfærð rekstrarspá fyrir næstu fjóra ársfjórðunga.