Farþegafjöldi Icelandair er nú kominn hátt upp í 90 prósent af því sem hann var fyrir kórónuveirufaraldurinn.

Þetta segir Bogi Nils Bogason, forstjóri Icelandair.

Samkvæmt mánaðarlegum flutningatölum sem birtar voru í Kauphöll í morgun fór fjöldi farþega hjá Icelandair í millilandaflugi yfir hálfa milljón í júlí.

Þetta er í fyrsta sinn sem farþegafjöldi í millilandaflugi fer yfir hálfa milljón í einum mánuði frá háannatíma árið 2019.

Talsverðar raskanir

Icelandair flutti í heild sinni 529 þúsund farþega í innanlands- og millilandaflugi, samanborið við 219 þúsund í júlí í fyrra og 431 þúsund í júní síðastliðnum.

Fjöldi farþega til Íslands var 230 þúsund og frá Íslandi 57 þúsund. Þá voru tengifarþegar 217 þúsund eða um 43 prósent af heildarfjölda millilandafarþega.

Talsverðar raskanir urðu í leiðakerfi Icelandair í júlí vegna krefjandi aðstæðna á flugvöllum víða erlendis en stundvísi var 64 prósent í júlí mánuði.

Krefjandi umhverfi

Bogi segir ánægjulegt að sjá þann mikla árangur sem starfsfólk Icelandair hefur náð við að byggja starfsemina upp í krefjandi umhverfi í kjölfar heimsfaraldursins.

„Nú náðum við þeim áfanga að flytja yfir hálfa milljón farþega í fyrsta sinn frá því í ágúst 2019 og er farþegafjöldinn kominn upp í hátt í 90% af því sem var fyrir faraldur. Þá er sætanýtingin eftirtektarverð en hún er ein sú mesta frá upphafi í einum mánuði. Eftirspurn er og hefur verið mikil og ljóst er að mikil uppsöfnuð ferðaþörf er til staðar.

Þá hefur sala á Saga Premium sætum gengið vel. Allt er þetta til marks um að leiðakerfið er í góðu jafnvægi og að þær aðlaganir sem við höfum gert á því samhliða árangursríkri tekjustýringu og öflugu sölu- og markaðsstarfi hafa skilað settu marki,“ segir Bogi.

Hann segir aðstæður á flugvöllum erlendis hafa haft umtalsverð áhrif á flugferðir og að félagið leggi mikla áherslu á að bregðast við þeim aðstæðum sem hafa skapast eftir fremsta megni.

Lofar starfsfólki

Að sögn Boga hefur starfsfólk Icelandair náð að halda áhrifunum í lágmarki með mikilli vinnu, útsjónarsemi og þjónustulund.

„Einnig er ástæða til þess að hrósa þeim sem starfa í ferðaþjónustu á Íslandi í heild. Isavia, tollgæslan, landamæraeftirlitið og aðrir rekstraraðilar á Keflavíkurflugvelli hafa náð að bregðast hratt við og haldið í við öflugan viðsnúning í farþegafjölda um flugvöllinn.

Eins hafa ferðaþjónustuaðilar um allt land sýnt mikinn sveigjanleika með því að stórauka starfsemi sína á stuttum tíma og náð þannig að þjónusta sambærilegan fjölda ferðamanna og árið 2019. Með þessu samheldna átaki auk aðgerða ríkisstjórnarinnar í heimsfaraldrinum hefur verið unnt að endurreisa ferðaþjónustu á Íslandi með miklum glæsibrag,“ segir Bogi að lokum.