Af 951 fyrirtæki í fyrirtækjaskrá Skattsins, sem tekið var til gjaldþrotaskipta á árinu 2021, voru 210 með virkni á fyrra ári, 44 prósentum færri en 2020 þegar þau voru 375. Þar af voru 61 í byggingarstarfsemi og mannvirkjagerð (44 prósent fækkun), 34 í heild- og smásöluverslun og viðgerðum á vélknúnum ökutækjum (42 prósent fækkun), 38 í einkennandi greinum ferðaþjónustu (60 prósent fækkun) og 77 í öðrum atvinnugreinum (31 prósent fækkun). Þetta kemur fram í samantekt Hagstofunnar sem birt var í morgun.

Frá 2019 hefur launþegum fyrirtækja sem tekin eru til gjaldþrotaskipta fækkað.

Þegar tekin eru saman þau fyrirtæki sem lýst voru gjaldþrota árið 2021 var fjöldi launafólks hjá þeim um 1.254 að jafnaði árið áður. Þetta er um 60 prósent samdráttur frá 2020 þegar launafólk gjaldþrota fyrirtækja á fyrra ári var að jafnaði 3.158. Mælt í fjölda launafólks á fyrra ári voru áhrif gjaldþrota árið 2021 minni en árið 2020 í öllum atvinnugreinaflokkum.

Samtals voru 23 fyrirtæki, sem skráð voru í fyrirtækjaskrá Skattsins, tekin til gjaldþrotaskipta í desember síðastliðnum. Af þeim voru 14 með virkni á síðasta ári, það er annað hvort með launafólk samkvæmt staðgreiðsluskrá eða veltu samkvæmt virðisaukaskattskýrslum, sem er 39 prósent fækkun frá desember 2020.

Hjá fyrirtækjum sem tekin voru til gjaldþrotaskipta á fjórða ársfjórðungi 2021 (október-desember) var fjöldi launafólks að jafnaði um 165 á fyrra ári. Þetta er um 76 prósent fækkun frá fjórða ársfjórðungi 2020 þegar launafólk gjaldþrota fyrirtækja á fyrra ári var að jafnaði um 677. Mælt í fjölda launafólks á fyrra ári voru áhrif gjaldþrota á fjórða ársfjórðungi 2021 minni en á sama ársfjórðungi árið áður í öllum atvinnugreinaflokkum.