Eyjólfur Árni Rafnsson, sem tók við formennsku Samtaka atvinnulífsins árið 2017, gefur áfram kost á sér til formennsku. Þetta kemur fram í tilkynningu á vef Samtaka atvinnulífsins.

Haft er eftir Eyjólfi að ískyggilegar horfur um langvinnt atvinnuleysi valdi áhyggjum.

„Stærsta áskorun yfirvalda og aðila vinnumarkaðar á komandi misserum verður að vinna á atvinnuleysinu. Þótt efnahagsaðgerðir stjórnvalda hafi mildað höggið sem kórónukreppan olli til skamms tíma, birtast þær sömu aðgerðir í stóraukinni skuldsetningu og hallarekstri ríkissjóðs. Þar kristallast sú staðreynd að umsvif atvinnulífsins og framleiðslugeta hafa allt að gera með stöðu ríkissjóðs sem aftur stendur undir því velferðarkerfi sem íslenskt samfélag reiðir sig á,” segir Eyjólfur..

„Þessi risavöxnu verkefni verða stærstu viðfangsefni þeirrar ríkisstjórnar sem tekur við eftir kosningar síðar á árinu. Nú er mikilvægt að allir vinni samstíga að því sameiginlega verkefni að skapa störf hjá fyrirtækjum í atvinnulífinu. Leiðin út úr kreppunni er ekki sú að fjölga opinberum störfum. Þvert á móti eru stöndug fyrirtæki forsenda þess að skapa verðmæt störf. Með því að auka súrefni til atvinnulífsins bætum við lífskjör fólks í landinu.”

Eyjólfur, semhefur setið í stjórn SA frá árinu 2014 og í framkvæmdastjórn SA frá 2016, segir viðburðaríkt og sögulegt starfsár að baki hjá Samtökum atvinnulífsins.

„Forgangsverkefnin fólust ekki síst í því að vinna tillögur upp í hendur stjórnvalda og beita okkur fyrir því að aðgerðir í efnahagsmálum yrðu útfærðar með sem bestum hætti. Þá einbeittum við okkur að því að miðla upplýsingum fljótt og örugglega á óvenjulegum tímum til félagsmanna. “

Reglulegir upplýsingafundir voru haldnir um sóttvarnaraðgerðir, útfærslur efnahagsaðgerða sem ríkisstjórnin kynnti í áföngum og um horfur í atvinnulífinu til lengri og skemmri tíma.

Rafræn kosning formanns meðal aðildarfyrirtækja SA fyrir starfsárið 2021-2022 hefst þann 14. apríl og verður tilkynnt um kjörið á aðalfundi Samtaka atvinnulífsins þann 12. maí.