Erlendur Magnússon, eigandi Total Capital Partners, er nýr stjórnarformaður Heimavalla en hluthafafundur félagsins fór fram í morgun. Erlendur og Arthur Irving yngri, fyrrum forstjóri kanadíska olíufélagsins Irving Oil, voru kjörnir nýir í stjórn íbúðaleigufélagsins.

Stjórnarmennirnir Anna Þórðardóttir, Halldór Kristjánsson og Hildur Árnadóttir voru öll endurkjörin en Halldór var kjörinn varaformaður stjórnar.

Sjö manns gáfu kost á sér í stjórnina en þeir Einar Símonarson og Vilhjálmur Bergs hlutu ekki brautargengi til stjórnarsetu.

Erlendur er sem fyrr segir eigandi og stjórnarformaður Total Capital Partners en hann starfaði sem framkvæmdastjóri hjá Íslandsbanka og forverum hans á árunum 1997 til 2008. Hann lét af störfum sem stjórnarformaður greiðslukortafyrirtækisins Borgunar í mars síðastliðnum.