Erlend kortavelta dróst jafnt og þétt saman allan marsmánuð og var í lok mánaðar um 5 prósent þess sem hún var í upphafi hans. Þetta kemur fram í frétt á vef Hagstofu Íslands en þróun erlendrar kortaveltu varpar ljósi á stöðu og þróun ferðaþjónustunnar.

Kortavelta á innlendum kortum dróst jafnt og þétt saman þegar leið á marsmánuð, ef frá eru taldir dagar þar sem tilkynntar voru breyttar reglur tengdar Covid-19 faraldrinum. Eftir að samkomubann var komið á breyttist kortavelta og dróst almennt saman.

„Þróun kortaveltu í dagvöruverslun varpar ágætu ljósi á kauphegðun heimila í mars, en veltan fer vaxandi alla vikuna og er mest á föstudögum. Veltan dregst verulega saman á sunnudögum og fer svo aftur vaxandi út vikuna,“ segir í fréttinni.

Veruleg aukning var í kortaveltu þegar tilkynnt var um breyttar reglur um samkomubann 13. mars, en þann dag var nær tvöfalt meiri velta en á meðaldegi. Eftir að samkomubanni var komið á breyttist kortavelta í dagvöru lítið.

Velta erlendra korta.PNG