Endufjármögnun og sala á Icelandair Group á Icelandair Hotels er á lokametrunum samkvæmt tilkynningu Icelandair í kvöld.

Stjórn Icelandair Hotels skrifaði í dag undir samning við Arion Banka um 8 milljarða króna lán, eða um 65 milljónir bandaríkjadala, þess efnis. Berjaya hefur nú þegar greitt Icelandair Group um 1,8 milljarð króna eða um það bil 30% af kaupverði félagsins og verða um 3,4 milljarðar króna (29 milljónir bandaríkjadala) nú greiddir í kjölfar endurfjármögnunar Icelandair Hotels.

Skilyrði sem sett voru fyrir sölunni hafa þá að mestu verið uppfyllt en lokagreiðsla fyrir kaupin er áætluð þann 28. febrúar 2020. Er það tveggja mánaða seinkun á söluferlinu sem rakin er til gjaldeyrishafta í Malasíu. Kaupandi hefur þegar lagt fram staðfestingu á fjármögnun eftirstöðva kaupverðsins og samþykkt að greiða 6% ársvexti af þeim, samkvæmt tilkynningu Icelandair Group.

Heildargreiðslur til Icelandair Group vegna kaupanna eru um 10,1 milljarður króna eðá 84 milljónir bandaríkjadala en stjórn Icelandair Group skrifaði 13. júlí síðastliðinn undir samning við dótturfélag Berjaya Land Berhad um kaup á 75% hlut í Icelandair Hotels og tengdum fasteignum. Eitt af skilyrðum kaupanna var endurfjármögnun hótelfélagsins.

Sem fyrr segir hefur 1,8 milljarður króna eða 15 milljónir bandaríkjadala, þegar verið greiddur, og lokagreiðsla að fjárhæð um 4,9 milljarðar verður greidd þann 28. febrúar 2020.

Einfaldari rekstur og skýrari fókus

Bogi Nils Bogason, forstjóri Icelandair Group, sagði í kvöldfréttum RÚV söluna á Icelandair Hotels skipta talsverðu máli fyrir rekstur Icelandair. „Þetta er einföldun á rekstri og skýrari fókus.“

Sagði hann jafnframt neikvæðra áhrifa Max- vélanna gæta enn þrátt fyrir að samið hafi verið um bætur en býst hann við að ferðamönnum muni fjölga á ný á næsta ári.

„Við ætlum nú að einbeita okkur að því að reka pínulítið flugfélag hérna á Íslandi,“ sagði Bogi Nils sem stefnir að því að reka félagið með hagnaði á næsta ári.

Berjaya Land Berhad er skráð félag í Malasíu og starfar meðal annars í hótelrekstri, smásölu og fasteignaþróun. Berjaya Land Berhad og tengd félög eru með um 4.700 starfsmenn og nema árlegar tekjur samstæðunnar 1.76 milljarði bandaríkjadala. Stofnandi og stjórnarformaður Berjaya Group er Vincent Tan.