Elvar Ingi Þorsteinsson og Þorgerður Elva Magnúsdóttir hófu nýverið störf hjá Birtingahúsinu. Þau munu sinna birtingaráðgjöf og markaðsgreiningum fyrir viðskiptavini félagsins.

Elvar er fæddur og uppalinn í Neskaupstað. Hann hefur sinnt ýmsum og ólíkum störfum í gegnum tíðina, meðal annars hjá Síldarvinnslunni þar sem hann starfaði við sjómennsku og svo síðar verkstjórn.
Hann stofnaði ThorMedia sem sérhæfði sig í birtingum á samfélagsmiðlum. Elvar útskrifaðist úr viðskiptafræði með áherslu á markaðsmál og alþjóðaviðskipti frá viðskiptaháskólanum í Aarhus Danmörku árið 2015.
Þorgerður Elva Magnúsdóttir er með BSc. í viðskiptafræði með áherslu á reikningsskil og endurskoðun. Hún er að ljúka MSc. í markaðsfræði og alþjóðaviðskiptum.
Þorgerður kemur til starfa eftir að hafa sinnt afleysingastörfum hjá ÍMARK þar sem hún var verkefnastjóri. Áður vann hún hjá Lyfjaveri og Bianco Footwear Iceland þar sem hún sinnti sölu- og markaðsmálum.
„Þorgerður og Elvar smella afskaplega vel inn í okkar öflugu og stækkandi liðsheild. Við höfum á að skipa spennandi blöndu starfsfólks sem gerir starfið og vinnuumhverfið lifandi og skemmtilegt. Blanda af reynsluboltum og efnilegu fólki sem er sífellt að leitast við að bæta sig og sitt starf, og þar með hámarka árangur samstarfsaðila okkar," segir Hugi Sævarsson, framkvæmdastjóri Birtingahússins.

Birtingahúsið var stofnað árið 2000 og veitir faglega og óháða ráðgjöf um auglýsingabirtingar, markaðssetningu og uppbyggingu auglýsingaherferða. Félagið er í nánu alþjóðlegu samstarfi við Dentsu Aegis Network, sem hefur yfir að ráða einu allra stærsta og öflugasta neti markaðs- og birtingaráðgjafar í heiminum, með starfsemi á yfir 140 markaðssvæðum. Meðal dótturfélaga DAN eru Carat, Vizeum og iProspect.