Verslanir Krónunnar og Elko munu opna í gamla húsnæði Myllunnar í Skeifunni. Húsið í Skeifunni 19 verður tekið í gegn og eiga verslanirnar að opna um mitt næsta ár. Verslunarrýmið verður alls rúmir 4.000 fermetrar. Hinar verslanir Krónunnar og Elko í Skeifunni munu þá loka.

Ásta S. Fjeldsted, framkvæmdarstjóri Krónunnar, segir í tilkynningu að Skeifan sé eitt öflugasta verslunarsvæði landsins og flutningur í enn stærra húsnæði geri þeim kleift auka verulega við vöruúrvalið. „Við erum virkilega spennt að opna í þessu skemmtilega húsnæði sem verður ein stærsta verslun okkar á Höfuðborgarsvæðinu. Við munum eins og ávallt leggja okkur fram um að tryggja ferskleika og fjölbreytt vöruúrval á góðu verði fyrir viðskiptavini okkar“ segir Ásta.

Krónan.png

Gestur Hjaltason, framkvæmdastjóri Elko, er einnig ánægður.

„ELKO opnaði fyrst í Skeifunni árið 2004 en nú 17 árum seinna hlakkar okkur mikið til í að taka á móti viðskiptavinum okkar í nýju og stærra húsnæði á svæðinu. Verslunin verður ein glæsilegasta raftækjaverslun landsins en hún verður sett upp í nýju útliti líkt og sjá má í verslunum ELKO á Akureyri og í Leifsstöð. Aukinn fermetrafjöldi kemur til með að hjálpa okkur að bæta enn frekar þjónustu og vöruúrval við okkar trausta hóp viðskiptavina.“