Bendikt Gíslason, bankastjóri Arion banka, segir að rekstrarumhverfi bankans sé þess eðlis að ekki sé lengur hjá því komist að gera breytingar sem miða að því að einfalda reksturinn.

Þetta kom fram í tölvupósti sem bankastjórinn sendi á starfsmenn bankans í morgun og Markaðurinn hefur undir höndum. Starfsfólki Arion Banka mun fækka um eitt hundrað eða um tólf prósent samkvæmt nýjum skipulagsbreytingum.

„Við teljum aðstæður í umhverfi bankans, eiginfjárkröfur, skattar og harðnandi samkeppni, sem og háan rekstrarkostnað, vera þess eðlis að ekki sé lengur hjá því komist að gera breytingar sem miða að því að einfalda starfsemina,“ segir í tölvupóstinum.

„Við þurfum að aðlaga okkur að aðstæðum hverju sinni. Þannig miðar nýtt skipulag að því að gera okkar þjónustu enn betri og styðja betur við stefnu bankans, sem í öllum aðalatriðum er óbreytt – að veita viðskiptavinum okkar alhliða fjármálaþjónustu.“

Stjórn Arion banka samþykkti breytingarnar á fundi sínum í morgun og taka þær gildi í dag. Sviðum bankans fækkar um tvö og ýmis verkefni færast til innan bankans með það að markmiði að einfalda starfsemina.

Hér er tölvupóstur bankastjórans í heild sinni:

Sæl

Í dag munum við taka það erfiða skref að tilkynna um eitt hundrað starfsmönnum bankans um starfslok þeirra. Um 80% þeirra starfa í höfuðstöðvum og 20% á öðrum starfsstöðvum. Það eru því margir sem munu kveðja í dag, gott samstarfsfólk og vinir sem hafa lagt sitt af mörkum til uppbyggingar bankans á undanförnum árum.

Fækkun starfsfólks er liður í nokkuð umfangsmiklum skipulagsbreytingum sem taka gildi í dag þó það muni taka nokkurn tíma að innleiða þær að fullu. Við þurftum reglum samkvæmt fyrst að tilkynna um breytingarnar í kauphöll og það gerðum við rétt í þessu, eða um leið og ákvörðun stjórnar lá fyrir. Þeim sem munu hætta í dag verður tilkynnt það svo fljótt sem auðið er. Þetta verður erfiður dagur fyrir okkur öll, ekki síst þá sem starfa í höfuðstöðvunum þar sem breytingarnar verða mestar.

Við teljum aðstæður í umhverfi bankans, eiginfjárkröfur, skattar og harðnandi samkeppni, sem og háan rekstrarkostnað, vera þess eðlis að ekki sé lengur hjá því komist að gera breytingar sem miða að því að einfalda starfsemina. Við þurfum að aðlaga okkur að aðstæðum hverju sinni. Þannig miðar nýtt skipulag að því að gera okkar þjónustu enn betri og styðja betur við stefnu bankans, sem í öllum aðalatriðum er óbreytt – að veita viðskiptavinum okkar alhliða fjármálaþjónustu.

Sviðum bankans fækkar um tvö og ýmis verkefni færast til innan bankans. Helstu breytingarnar snúa að þjónustu við stór fyrirtæki en við munum sameina fyrirtækjasvið og hluta fjárfestingarbankasviðs í eitt svið og einfalda útlánaferlið. Markaðsviðskipti og eignastýring verða jafnframt eitt svið. Viðskiptabankasvið tekur yfir markaðsmálin og fyrirtækjalausnir. Lögfræðiráðgjöf færist að hluta inn á tekjusviðin en yfirlögfræðingur mun taka til starfa á skrifstofu bankastjóra og leiða þar lögfræðiráðgjöf bankans.

Skipulagsbreytingarnar verða kynntar nánar síðar í dag og á morgun.

Við munum gera það sem við getum til að gera þeim sem í dag hætta störfum starfslokin léttbærari.

Ég vil þakka þeim sem munu kveðja fyrir þeirra störf og óska þeim velfarnaðar í framtíðinni.

Með kveðju,

Benedikt