Vegna skorts á jörðum til endurheimtar votlendis og áhrifa krafna um vottun á fjármögnun verkefna, hafa stjórn Votlendissjóðs og framkvæmdastjóri ákveðið að draga úr rekstri sjóðsins þar til alþjóðleg vottun kolefniseininga sjóðsins er í höfn, en það ferli er þegar hafið. Fram að vottun verður látið af sölu kolefniseininga. Samið hefur verið við framkvæmdastjóra sjóðsins, Einar Bárðarson, um starfslok en hann mun áfram verða stjórn sjóðsins innan handar við útistandandi verkefni.
Þetta kemur fram í tilkynningu frá sjóðnum í dag en hann kallar þó eftir áframhaldandi samvinnu við landeigendur sem eru áhugasamir um minnkun losunar gróðurhúsalofttegunda, eflingu fuglalífs og lífs í vötnum og ám og/eða sölu alþjóðlega vottaðra kolefniseininga.
„Stjórn Votlendissjóðs þykir miður að þurfa að draga tímabundið saman seglin í starfseminni, þar sem hvert ár sem losun frá framræstu votlendi hefur verið stöðvuð telur í baráttunni gegn hlýnun jarðar. Stærsti kosturinn við endurheimt votlendis, sem náttúrumiðuð lausn í loftslagsbaráttunni, er að einungis tekur nokkra daga eða vikur frá framkvæmd þar til að losun gróðurhúsalofttegunda hefur minnkað verulega. En á meðan ekki fást jarðir til endurheimtar og möguleikar til fjármögnunar verkefnanna eru skertir, er það mat stjórnarinnar að þetta sé ábyrgasti kosturinn í stöðunni, samhliða því að unnið er að vottun. Stjórn sjóðsins vonast þó eftir áframhaldandi stuðningi samfélagsins við þetta mikilvæga verkefni. Við erum enn þá fullviss um að endurheimt votlendis sé ein besta og skilvirkasta loftslagsaðgerð sem stendur til boða á Íslandi,“ segir Ingunn Agnes Kro, stjórnarformaður Votlendissjóðs, í tilkynningunni.
Þar kemur einnig fram að vinna við að afla Votlendissjóði alþjóðlega vottun sé í fullum gangi en samkvæmt áætlun er gert ráð fyrir því að ferlinu ljúki á seinni hluta þessa árs. Því standa vonir til þess að hægt verði að hefja vottaða endurheimt á seinni hluta ársins 2023 og sölu á virkum einingum, fyrir hönd áhugasamra landeigenda, á síðari hluta ársins 2024.
Í tilkynningunni kemur einnig fram að endurheimt í fyrra hafi verið stjórninni mikil vonbrigði en aðeins var hægt að endurheimta 79 hektara af votlendi, sem er undir 0,1 prósent af því sem talið hefur verið unnt að endurheimta hérlendis. Þau segja nauðsynlegt að taka skref til baka og skoða heildarmyndina.
„Ýmsir þættir hafa haft neikvæð áhrif á öflun jarða til endurheimtar votlendis, svo sem skortur á fjárhagslegum hvötum til landeigenda, bið eftir formlegri staðfestingu á áhrifum endurheimtar votlendis á losun gróðurhúsalofttegunda frá íslensku votlendi, skortur á vottun og skortur á slagkrafti af hálfu stjórnvalda í málaflokknum. Með vottun vonast Votlendissjóður til þess að rutt verði úr vegi flestum þessara þröskulda.“
Tilkynninguna er hægt að kynna sér í heild sinni hér á vef sjóðsins.
