Átján manns var sagt upp störfum hjá Eimskipum í síðustu viku. Greint var frá á Vísi fyrst. Ólafur William Hand, upplýsingafulltrúi fyrirtækisins, staðfestir uppsagnirnar í samtali við Fréttablaðið og segir að um sé að ræða sextán starfsmenn fyrirtækisins hér á landi en tvo á erlendum skrifstofum þess.

Hann segir að ákvörðunin sé hluti af hagræðingarferli sem hefur verið í gangi undanfarið. Hann segist hins vegar búast við að uppsagnirnar verði ekki fleiri á árinu en erfitt sé að segja til um hvað muni gerast á komandi mánuðum.

Eimskip gaf út uppfærða afkomuspá í síðasta mánuði þar sem afkoman var lækkuð um 15 prósent, úr 57 til 63 milljón evra rekstrarhagnaði niður í 49 til 53 milljóna hagnað.