Eignarhlutur erlendra fjárfesta í Íslandsbanka nemur nú 7,8 prósentum en þeim var úthlutað um 10,5 prósenta hlut í frumútboði bankans í júní. Þetta kemur fram í frétt Viðskiptablaðsins.

Hlutur Capital World hefur minnkað úr 4,3 prósentum í 3,8 en RWC hefur selt um þriðjung af því sem hann fékk úthlutað og fer í dag með um 1 prósenta hlut.

Fljótlega í kjölfar útboðsins seldu sex erlendir sjóðir öll bréf sín í bankanum. Á móti hafa íslenskir lífeyrissjóðir aukið við hlut sinn í bankanum. LSR hefur til dæmis bætt við sig um 0,6 prósenta hlut hlut, LIVE 0,3 prósentum og Stapi í það minnsta 0,2 prósent hlut í október, segir í frétt Viðskiptablaðsins.

Kadúseu, félag sem Sveinn Valfells á 80 prósenta hlut í, á nú 0,15 prósenta hlut í Íslandsbanka og er markaðsvirði hans um 380 milljónir króna, samkvæmt fréttinni. Eftir hlutafjárútboðið í júní átti fjárfestingafélagið 0,05 prósenta hlut í bankanum.

Sveinn, sem var framkvæmdastjóri Steypustöðvarinnar í áraraðir, sat í bankaráði Íslandsbanka fyrir allnokkru.