Umframeftirspurn eftir hlutum í almennu hlutafjárútboði Icelandair Group, sem lauk klukkan 16 í gær, nam 85 prósentum frá fagfjárfestum og almennum fjárfestum. Útboðsgengi í báðum tilboðsbókum var ein króna á hlut. Í útboðinu voru boðnir til sölu 20 milljarðar í nýjum hlutum.

Alls bárust yfir níu þúsund áskriftir að fjárhæð 37,3 milljarðar króna. Stjórn Icelandair hefur samþykkt áskriftir að fjárhæð 30,3 milljarða eða sjö milljörðum lægri fjárhæð en heildarfjáræð þeirra áskrifta sem bárust.

Ákveðið hefur verið að nýta heimild til stækkunar útboðsins þannig að fjöldi seldra hluta verður 23 milljarðar. Þetta kemur fram í tilkynningu frá félaginu sem barst skömmu eftir miðnætti.

Þúsund áskriftum frá starfsmönnum úthlutað án skerðingar

Nýjum hlutum fylgja 25 prósent áskriftarréttindi eða sem nemur 5,75 milljörðum hluta. Úthlutun var í samræmi við skilmála útboðsins og fá núverandi hluthafar sem tóku þátt í útboðinu fulla úthlutun í samræmi við hlutafjáreign þeirra.

Þá bárust áskriftir frá um 1.000 starfsmönnum og verður þeim úthlutað án skerðingar. Áskriftir að jafnvirði 1 milljón kr. eða lægri verða ekki skertar, en hlutfallsleg skerðing annarra áskrifta í báðum tilboðsbókum er um 37 prósent.

Mikil eftirspurn var eftir hlutum frá almennum fjárfestum og verður eignarhlutur þeirra í félaginu um 50% í kjölfar útboðsins en fjöldi hluthafa í félaginu í kjölfar útboðs verður yfir 11.000.

Sjö þúsund nýjir hluthafar boðnir velkomnir

Bogi Nils Bogason, forstjóri Icelandair Group segist auðmjúkur og þakklátur fyrir traustið sem félaginu var sýnt í hlutafjárútboðinu. „Nýr kafli er að hefjast í yfir 80 ára sögu félagsins og ég býð yfir sjö þúsund nýja hluthafa velkomna til liðs við okkur,“ segir Bogi.

Gjalddagi og eindagi áskriftarloforða í útboðinu er 23. september 2020 en greiddir hlutir verða afhentir þegar hlutafjáraukning hefur verið skráð hjá Fyrirtækjaskrá og verða hlutirnir gefnir út í gegnum Nasdaq CSD Ísland í síðasta lagi 9. október 2020. Að teknu tilliti til lögbundinna tímamarka en stefnt er að því að afhenda nýju hlutina fyrr. Gert er ráð fyrir að nýju hlutirnir verði teknir til viðskipta á Aðalmarkaði Nasdaq Iceland eigi síðar en þann 12. október 2020.

Heildarhlutafé verður 28,4 milljarðar

Hlutafé félagsins er 5,4 milljarðar hluta og eftir útgáfu nýrra hluta verður heildarhlutafé alls um 28,4 milljarðar hluta. Úthlutun og skráning áskriftarréttinda verður eigi síðar en 15. október 2020. Fyrirtækjaráðgjöf Landsbankans og fyrirtækjaráðgjöf Íslandsbanka voru umsjónaraðilar útboðsins.