Landsbankinn spáir um 5,1 prósent hagvexti á árinu í heild en landsframleiðsla hér á landi jókst um 3,5 prósent á fyrri helmingi þessa árs. Þá spáir bankinn að útflutingur muni aukast um 18 prósent, einkaneysla um 5 prósent og heildarfjármunamyndun um 10,8 prósent. Reiknað er með samfelldum hagvexti á spátímabilinu næstu þrjú árin; 5,5 prósent á næsta ári, 1,7 prósent árið 2023 og 2 prósent árið 2024. Þetta kemur fram í tilkynnigu frá bankanum. Nú stendur yfir fundur þar sem hagfræðideild Landsbankans fer yfir þjóðhags- og verðbólguspá bankans.

„Áætlað er að verg landsframleiðsla nái sama stigi og fyrir faraldurinn undir lok næsta árs. Áhrif mikilla loðnuveiða á næsta ári mun hafa 1,7 prósentustiga jákvæð áhrif á hagvöxt, að öðru óbreyttu. Útlit er fyrir að laun muni áfram hækka töluvert næstu tvö árin, m.a. í ljósi þess að útlit er fyrir að ákvæði kjarasamninga um sérstaka hagvaxtarauka þann 1. maí bæði árin 2022 og 2023 verði virk, gangi hagvaxtarspá okkar eftir," segir í tilkynningu frá bankanum.

Daníel Svavarsson, forstöðumaður hagfræðideildar Landsbankans segir að efnahagsbatinn sé hafinn af fullum krafti.

„Efnahagsbatinn er hafinn af fullum krafti og það er nokkuð bjart framundan. Ferðaþjónustan er vöknuð úr dvala, horfur eru á sérstaklega góðri loðnuvertíð og ýmis ytri skilyrði eru okkur hagfelld. Atvinnuleysi minnkar hratt og við gerum ráð fyrir að árið 2024 verði atvinnuleysi minna en það var áður en faraldurinn skall á. Við stöndum engu að síður frammi fyrir ýmsum áskorunum. Ein sú stærsta er að rétta af hallann á ríkissjóði sem hefur tekið á sig miklar byrðar. Þá mun kröftugur efnahagsbati og þrálát verðbólga knýja á um töluverða hækkun stýrivaxta, áður en aðstæður skapast til að lækka þá á nýjan leik.“

Dagskrá fundarins er eftirfarandi:

  • Lilja B. Einarsdóttir, bankastjóri Landsbankans, setur fundinn.
  • Þjóðhags- og verðbólguspá Landsbankans 2021 – 2024. Daníel Svavarsson, forstöðumaður Hagfræðideildar Landsbankans.
  • Hefur toppnum verið náð? Þróun og horfur á fasteignamarkaði. Una Jónsdóttir, hagfræðingur í Hagfræðideild Landsbankans.
  • Tekist á við byltingu: Eftirköst faraldursins og áhrif hans að flýta breytingum sem fylgja fjórðu iðnbyltingunni. Paul Donovan, aðalhagfræðingur hjá UBS banka (UBS Global Wealth Management).

Fylgjst má með fundinum hér:

https://streymi.landsbankinn.is/