Origo hefur gert samstarfssamning við CSIS Security Group, eitt þekktasta fyrirtæki heims í öryggislausnum, en samstarfið gerir upplýsingatæknifyrirtækinu kleift að efla lausnir og ráðgjöf í öryggismálum og lágmarka áhættu á svikapóstum fyrir fyrirtæki, stofnanir og einstaklinga.

Þetta kemur fram í fréttatilkynningu frá Origo.

Anton Már Egilsson, forstöðumaður skýja- og öryggislausna hjá Origo, segir í tilkynningunni að umfang netglæpa hafi aukist verulega. Ísland hafi ekki farið varhluta af þeirri þróun þar sem glæpamenn nýti aukið aðgengi til að byggja upp trúverðug samskipti við íslensk fyrirtæki með það að markmiði að svíkja þau um fé og upplýsingar.

„Talið er að á síðasta ári hafi Íslendingar tapað allt að einum og hálf­um millj­arði króna með þess­um hætti," segir Anton Már.

Hann nefnir að með samstarfi við CSIS geti Origo eflt varnir fyrir viðskiptavini og dregið úr áhættu á að tölvuþrjótar komist upp með að svíkja fé út úr þeim.

,,Tölvuþrjótar geta komast yfir upplýsingar um reikninga eða breytt póstsamskiptum svo að þeir líti út fyrir að koma frá öðrum aðilum, til dæmis innan fyrirtækisins. Við þessi póstsamskipti eru hengd greiðslufyrirmæli þar sem beðið er um millifærslu á erlenda reikninga. Slíkur gjörningur getur litið út fyrir að vera eðlilegur póstur frá yfirmanni sem biður viðkomandi starfsmann um að greiða reikninga. Skilaboðin koma þó ekki frá réttum aðila heldur tölvuþrjótum," segir Anton Már.

Hann segir auk þess að Origo geti nú, með samstarfi með CSIS Security Group, greint hvern póst fyrir sig og varað rétta aðila við ef óeðlilegir hlutir eigi sér stað.

„Það er möguleiki að stöðva svik áður en í óefni er komið og fé glatast. Við getum í langflestum tilvikum séð hvort búið er að eiga við skjöl í póstum þar sem greiðslu er krafist. Við getum séð hvar upprunalega skjalið er búið til og hvort því hafi verið breytt.

Við greinum auk þess reikningsnúmerin. Ef ákveðnu reikningsnúmeri hefur verið beitt í svikamáli áður þá komumst við að því með aðstoð lausna CSIS. Lausnin er frábær viðbót við núverandi vöruframboð sem tekur á flestum öryggisþáttum," nefnir Anton Már í fréttatilkynningunni.