Nýr verslunarstjóri er Díana Sveinbjörnsdóttir.

Verslunin í Hrísey er lífæð samfélagsins þar og skiptir því miklu máli að stjórnun verslunarinnar sé í góðum höndum en stór hluti eyjarskeggja og sumarhúsaeigenda eru hluthafar í búðinni. Verslunin er opin allt árið og er þar einnig rekin afgreiðsla fyrir Póstinn, mannlegur hraðbanki og sjálfsafgreiðsluverslun utan opnunartíma. Þegar verslunin lagðist af fyrir nokkrum árum tók hópur fólks sig saman og stofnaði félag um nýja verslun sem hefur verið rekin síðan. Verslunin er opin allt árið en með styttan opnunartíma á veturna.

„Það er mikill fengur í því að Díana skuli gefa sig í þetta starf en hún hefur í nokkur ár unnið í versluninni, við afgreiðslu og aðstoð við verslunarstjóra. Ég hef mikla trú á því að Díana eigi eftir að standa sig vel með verslunina,“ segir Valgeir Magnússon, formaður stjórnar Hríseyjarbúðar.

Nánari upplýsingar um verslunina og opnunartíma má finna á Hrisey.is og á Facebook.