Daði Kristjánsson verðbréfamiðlari hefur látið af störfum hjá Fossum mörkuðum. Hann tekur við sem framkvæmdastjóri hjá nýstofnuðu félagi, Viska Digital Assets ehf., sem vinnur að því að koma á fót sérhæfðum fagfjárfestasjóði með áherslu á rafmyntir og bálkakeðjutækni.

Við starfslok Daða kemur Arnar Geir Sæmundsson yfir í teymi markaðsviðskipta hjá Fossum mörkuðum en var áður í fyrirtækjaráðgjöf Fossa.

„Ég kom til Fossa markaða árið 2018 og tími minn hjá félaginu hefur verið afskaplega skemmtilegur,“ segir Daði. „Hjá Fossum starfar þéttur hópur af hæfileikaríku fólki sem náð hefur góðum árangri eins og sést á sífellt meiri umsvifum félagsins á verðbréfamarkaði. Eftir 15 ár við verðbréfamiðlun þykir mér tími kominn til að breyta til. Ég hef varið stórum hluta af frítíma mínum síðustu ár í að kynna mér bálkakeðjutækni og fjárfest í rafmyntum. Þetta er ört vaxandi eignaflokkur þar sem ég sé mikil tækifæri á næstu árum.“

Arnar Geir býr að víðtækri reynslu á sviði fjármálaþjónustu, en áður en hann kom til starfa hjá Fossum fyrir tæpu ári síðan starfaði hann á fjárfestingasviði TM hf. og sem forstöðumaður fjárstýringar hjá Lykli fjármögnun hf. Þar áður starfaði hann í markaðsviðskiptum Arctica Finance hf. og H.F. Verðbréfum hf. Hann er með B.Sc. gráðu í fjármálaverkfræði frá Háskólanum í Reykjavik og Masters in Finance gráðu frá London Business School, auk þess að hafa lokið prófi í verðbréfaviðskiptum.