Íslenska sprotafyrirtækið CrankWheel hefur keypt rekstur danska nýsköpunarfélagsins Accordium.

CrankWheel hefur hingað til boðið upp á lausn sem hjálpar fólki að deila skjáborði yfir í hvaða tæki sem er án uppsetningar viðtakanda. Accordium hefur annars vegar einfaldað ferlið í kringum rafrænar undirskriftir og hins vegar boðið upp á myndbandslausn sem hjálpar notendum að ljá tölvupóstum og lendingarsíðum persónulegri blæ. Þetta kemur fram í tilkynningu.

CrankWheel er með yfir 50.000 notendur í sex heimsálfum. Yfirtakan styrkir vöruframboð og þjónustu til núverandi viðskiptavina en styður jafnframt við frekari vöxt á erlendum mörkuðum þar sem áhugi á stafrænum lausnum í sölu og þjónustustörfum hefur aukist gríðarlega í kjölfar heimsfaraldursins. Þessi þróun mun halda áfram þrátt fyrir að faraldurinn sé í rénun og afléttingu á samskiptatakmörkunum.

„Heimsfaraldurinn kom af stað og hraðaði stafrænni þróun flestra atvinnugreina. Með kaupunum getum við hjálpað okkar viðskiptavinum enn frekar að auka afköst og árangur sölufólks með stafrænum lausnum. Núna getum við boðið lausnir sem koma að næstum öllu söluferlinu. Allt frá því að gera fyrsta tölvupóstinn persónulegri, gera símtöl skilvirkari og yfir í að gera undirritun samninga einfaldari og skjótari,“ segir Jói Sigurðsson, stofnandi og framkvæmdastjóri CrankWheel.

„Þeir viðskiptavinir sem fóru að nota CrankWheel vegna ástandsins hafa séð að okkar lausn skilar þeim meiri árangri. Sölufólk þeirra mun í auknum mæli notast við fjarsölutækni í stað þess að hitta alla viðskiptavini. Þessi viðbót við okkar vöruframboð mun styrkja vöxt okkar erlendis og hjálpar okkur á þeirri vegferð að stytta, auðvelda og einfalda söluferlið hjá okkar notendum,” segir Þorgils Sigvaldason, meðstofnandi og tekjustjóri CrankWheel.