Íslenska fyrirtækið Controlant, sem þróað hefur tækni til að fylgjast með hitastigi lyfja og matvæla, hlaut í dag Nýsköpunarverðlaun Íslands árið 2020. Voru verðlaunin veitt við hátíðlega athöfn í Hörpu.

Þórdís Kolbrún R. Gylfadóttir, ferðamála-, iðnaðar- og nýsköpunarráðherra afhenti verðlaunin við hátíðlega athöfn í Hörpu en þau hafa hafa verið veitt frá árinu 1994.

Búnaður Controlant notaður til að tryggja dreifingu COVID-19 bóluefnis

Frá þessu er greint í tilkynningu frá en í rökstuðningi dómnefndar segir meðal annars:

„Hug- og vélbúnaður Controlant tryggir gæði viðkvæmra vara í flutningi og dregur úr sóun á lyfjum og matvælum. Controlant gefur framleiðendum lyfja og matvæla mikilvægar rauntímaupplýsingar um hitastig og raka sem fást með nettengdum gagnaritum. Áralöng fjárfesting í tækniþróunarstarfi er að skila sér um þessar mundir í hröðum vexti tekna og er starfsemin komin til rúmlega 100 landa.

Á meðal viðskiptavina félagsins eru mörg af stærstu lyfjafyrirtækjum heims. Lausnir félagsins verða mikilvægur hlekkur í dreifingu bóluefna við COVID-19 sem er eitt erfiðasta heilbrigðisvandamál sem heimsbyggðin er að fást við.

Það er mat dómnefndar að Controlant sé verðugur handhafi Nýsköpunarverðlauna Íslands árið 2020 og framundan séu spennandi tímar vaxtar og sóknar á mörkuðum.”

Hafa safnað 3,5 milljörðum á árinu

Gísli Herjólfsson, stofnandi og framkvæmdarstjóri Controlant, segir það vera mikinn heiður að fá verðlaunin.

„Okkar vegferð er gott dæmi um hvernig tækni og nýsköpun getur skipt sköpum í lífi fólks. Hvort sem það er með því styðja við aðfangakeðjuna sem kemur lyfjum, bóluefnum og matvælum á áfangastað eða með því að stuðla að umhverfisvænni starfsháttum,” er haft eftir Gísla í tilkynningu.

Controlant hefur vaxið hratt undanfarið en félagið hefur nýlega lokið við hlutafjárútboð þar sem söfnuðust tveir milljarðar króna. Alls hefur félagið því safnað sam­tals 3,5 millj­örðum í gegn­um hluta­fjárút­boð og breyti­leg skulda­bréf á ár­inu.

Nýlegir samningar sem Controlant hefur gert eru sagðir eiga eftir að tífalda veltu fyrirtækisins í um 4-5 milljarða á næstu tveimur árum. Fyrirséð að félagið muni stækka áfram til að mæta aukinni eftirspurn eftir afurðum fyrirtækisins en starfsmenn eru um 100 um þessar mundir.