Tölvuleikaframleiðandinn CCP, stafræna auglýsingastofan Sahara og málningavöruverslunin Flugger eru í efstu þremur sætunum sem bestu vinnustaðir Íslands hjá Great Place to Work (GPTW) sem er alþjóðleg stofnun um vinnustaðamenningu. GPTW hóf starfsemi hér á landi á síðasta ári. Þetta kemur fram í tilkynningu.

„Síðustu tvö ár hafa verið alvöru próf á þrautseigju en þau gildi sem aðgreindu bestu vinnustaði Íslands frá öðrum gerðu þeim kleift að sigla lygnan sjó. Covid-19 kann að hafa endurskilgreint vinnumenningu okkar en traust er eftir sem áður hornsteinn árangursdrifinna fyrirtækja á borð við þessi þrjú fyrirtæki,” segir Benedict Gautrey, framkvæmdastjóri hjá GPTW.

Great Place to Work nýtir gögn og þekkingu frá meira en 10.000 fyrirtækjum af öllum stærðum, árlega, til að setja viðmið um traust. Stofnunin notar kannanir til að greina hvernig starfsfólk hugsar og hvernig því líður og við að greina meginviðfangsefni sem þarf að takast á við til að skapa jákvæðar og veigamiklar breytingar, segir í tilkynningunni.

„Bestu vinnustaðir Íslands hafa allir stjórnendur sem hafa vísað veginn með hluttekningu, gagnsæi og bættum samskiptum til þess að stuðla að áframhaldandi frábærum vinnustöðum fyrir alla. Þegar þessar fordæmalausu aðstæður komu upp brugðust stjórnendur bestu vinnustaða ársins ekki við með örstjórnun á starfsfólki sínu. Þvert á móti. Þeir treystu fólki til þess að stjórna nýjum starfsaðferðum sínum og sköpuðu þannig traust á að þeir mundu halda áfram að gera það rétta,” segir Gautrey og bætir við að CCP Games, Sahara og Flugger séu fyrirtæki sem hafa skuldbundið sig til að setja starfsfólk sitt í forgang.

„Við vonum að viðurkenning til þessara fyrirtækja fyrir að hafa skapað frábæra vinnustaði fyrir allt starfsfólk muni veita öðrum fyrirtækjum á Íslandi innblástur til að slást í hóp rúmlega 10 þúsund fyrirtækja í heiminum sem hafa einsett sér að setja starfsfólkið í fyrsta sæti. Öll fyrirtæki með yfir 10 starfsmenn eru gjaldgeng til þess að fá viðurkenningu og það besta við þessar viðurkenningar er að þær eru algjörlega háðar endurgjöf starfsfólks. Það er einfaldlega starfsfólkið sem sker úr um hvort fyrirtæki er frábær vinnustaður. Við erum mjög spennt yfir þessum fyrsta lista yfir Bestu vinnustaði Íslands og hlökkum til að starfa með mörgum fleiri framúrskarandi fyrirtækjum á árinu,” segir Gautrey.