Brim hefur keypt skipið Iivid af Arctic Prime Fisheries ApS fyrir 58 milljónir danskra króna, jafnvirði tæplega 1,2 milljarða króna. Iivid var smíðaður í Noregi árið 1999 og er 67 metra langur og 1.969 brúttótonn.

Áætlað er að Iivid muni koma í flota félagsins í lok ágústmánaðar og mun fá nafnið Svanur RE 45. Þetta kemur fram í tilkynningu til Kauphallarinnar.

Guðmundur Kristjánsson, forstjóri Brims, situr í stjórn Arctic Prime Fisheries ApS.

Á síðastliðnu ári var tilkynnt að Brim hefði fjárfest í Arctic Prime Fis­heries á Suður-Græn­landi fyrir 85 milljónir evra og eignast 16,5 prósenta hlut í fyrirtækinu.

Útgerðfélag Reykjavíkur (áður Brim) keypti í Arctic Prime Fisheries árið 2013 og á 16,5 prósenta hlut.

Brim seldi Höfrung III AK 250 til Rússlands. Skipið verður afhent nýjum eigendum í september næstkomandi. Kaupandi er Andeg Fishing Collective í Murmansk og er söluverð fimm milljónir Bandaríkjadala, jafnvirði um 633 milljónir króna. Höfrungur var smíðaður í Noregi árið 1988, 56 metra langur, 1.521 brúttótonn.