Flugfélagið Icelandair hefur tilkynnt um breytingar við innritunarferli farangur á Keflavíkurflugvelli. Farþegum stendur nú til boða að innrita farangur sinn kvöldið fyrir flug.
Þjónustan verður í boði á milli 19 og 22 kvöldið fyrir bókað flug. Farþegar geta því mætt beint í öryggisleit á vellinum og einfaldað ferðalagið sitt.
Farið var í þessar breytingar þar sem Isavia stendur í miklum breytingum á farangursböndum í brottfararsal, sem getur þýtt lengri biðtími fyrir farþega. Innritun kvöldið áður gæti því komið í veg fyrir lengri afgreiðslutíma.
Þá hafa Icelandair og Öryggismiðstöðin hafið samstarf og stendur farþegum til boða að farangurinn þeirra verði sóttur heim og innritaður fyrir þá. Þjónustan verður í boði fyrir farþega á höfuðborgarsvæðinu sem hafa innritað sig rafrænt. Farþegar bóka þjónustu Öryggismiðstöðvarinnar í gegnum vefinn bagdrop.is og þar er einnig að finna verðskrá.
„Við erum alltaf að leita leiða til að auka þjónustuframboð okkar og við viljum leggja okkur fram um að draga úr áhrifum sem framkvæmdir á Keflavíkurflugvelli hafa á farþega. Þess vegna er mjög spennandi að kynna þessar tvær leiðir fyrir farþega til þess að auðvelda ferðalagið og stytta tímann sem fer í innritun á flugvellinum. Við hlökkum til að sjá viðtökur farþega við þjónustunni,“ segir Sylvía Kristín Ólafsdóttir, framkvæmdarstjóri markaðsmála og þjónustu hjá Icelandair.
