Bretinn John Shrimpton, annar af stofnendum asíska vogunarsjóðsins Dragon Capital, hefur keypt í Icelandair Group í eigin nafni fyrir liðlega 200 milljónir króna að markaðsvirði.

Samkvæmt uppfærðum lista yfir alla hluthafa flugfélagsins í dag, að því er heimildir Markaðarins herma, er hann skráður fyrir 150 milljónum hluta að nafnverði, eða um 0,53 prósenta eignarhlut, en gengi bréfa Icelandair stendur nú í 1,41 krónum á hlut.

Það gerir Shrimpton að stærsta erlenda fjárfestinum í hluthafahópi félagsins en bandaríski fjárfesetingasjóðurinn Par Capital, sem var um tíma stærsti hluthafi Icelandair, seldi allan 1,5 prósenta hlut sinn um miðjan síðasta mánuð.

Shrimpton kom að stofnun Dragon Capital, sem er með höfuðstöðvar í Víetnam, um miðjan tíunda áratug síðustu aldar, en hann lét af störfum þar árið 2010. Sjóðurinn er í dag með eignir í stýringu að andvirði um 3 milljarða Bandaríkjadala, jafnvirði um 400 milljarða íslenskra króna.

Eftir því Markaðurinn kemst næst fjárfestir Shrimpton í dag í eigin reikningi, einkum á vaxtamörkuðum (e. frontier markets), en kaup hans í Icelandair fóru fram fyrir nokkrum dögum. Það var Íslandsbanki sem hafði umsjón með viðskiptunum.

John Shrimpton stofnaði asíska vogunarsjóðinn Dragon Capital um miðjan tíunda áratug síðustu aldar en lét af störfum hjá sjóðnum árið 2010.

Icelandair Group sótti sér sem kunnugt er samtals 23 milljarða króna í almennu hlutafjárútboði sem fór fram um miðjan september en útboðsgengið var ein króna á hlut. Frá þeim tíma hefur gengi bréfa félagsins hækkað um liðlega 40 prósent.

Í gær var greint frá því að banda­ríska flug­mála­stjórnin (FAA) hefði aflétt kyrr­setningu á öllum Boeing 737 Max-flug­vélum í Banda­ríkjunum. Flug­vélarnar hafa verið kyrr­settar í rúma tuttugu mánuði eftir að tvær brot­lendingar voru raktar til galla í stýri­kerfi vélanna.

Bogi Nils Boga­son, for­stjóri Icelandair Group, sagðist í samtali við Fréttablaðið fagna því að vélarnar megi fljúga á ný vestan­hafs en Icelandair á enn eftir að frá sex 737 MAX-vélar afhentar frá Boeing.

„Við erum búin að fá af­hentar sex vélar og vorum með tíu vélar til við­bótar í pöntun en í sumar skrifuðum við undir sam­komu­lag þar sem við fækkuðum vélum í pöntun, þannig við fáum sam­tals tólf,“ sagði Bogi.

Hann býst við því að Icelandair fái þrjár vélar í vor og þrjár til við­bótar um ára­mótin 2021-2022. „Við gerum ráð fyrir því að nota MAX-vélarnar næsta sumar. Það er það sem er upp­leggið okkar,“ að sögn Boga.