Auglýsingastofan Brandenburg hreppti hin Clio verðlaunin fyrir nýja ásýnd íslensku landsliðanna í knattspyrnu (Brand Identity), en verkefnið vann stofan fyrir Knattspyrnusamband Íslands.

Verkefni Brandenburgar fyrir KSÍ fékk verðlaun í stórum flokki íþróttatengdra verkefna (Clio Sports Winners) ásamt Nike, Budweiser, ESPN og Adidas. Þess má geta að ásýnd íslensku landsliðanna varð hlutskarpari en stórliðið bandaríska körfuboltaliðið Philadelphia 76ers í sínum flokki, segir í tilkynningu.

Hrafn Gunnarsson og Dóri Andrésson, hönnunarstjórar á Brandenburg, eru að vonum himinlifandi. „Þetta er dálítið eins og að fá Grammy-verðlaunin í faginu. Ferlið var langt og strangt og talsverð áskorun en á sama tíma mjög gefandi og lærdómsríkt,“ segir Dóri. „Svo erum við auðvitað afar þakklát fyrir það traust sem KSÍ hefur sýnt okkur. Dálítið eins og í fótboltanum, liðsheildin skilaði þessu alla leið,“ bætir Hrafn við.

Stefán Sveinn Gunnarsson, markaðsstjóri KSÍ, tekur í sama streng: „Við erum auðvitað mjög ánægð með þessa viðurkenningu. Merkið sjálft hefur fengið frábærar viðtökur, hérlendis jafnt sem erlendis, og var auðvitað toppurinn á þeim ísjaka sem heildarendurskoðun vörumerkja KSÍ er.”

Clio verðlaunin sem stofnuð voru 1959 eru með þeim virtustu á alþjóðavísu og keppa þar stærstu auglýsingastofur hvaðanæva að fyrir heimsþekkt vörumerki. Clio verðlaunin hljóta þau verk sem dómnefnd telur eftirtektarverð, faglega leyst og líkleg til að verða öðrum hvatning í faginu.