Svigrúm WOW air til að greiða skuldir vegna gjalda á Keflavíkurflugvelli skekkir samkeppni flugfélaga á Íslandi að sögn Boga Nils Bogasonar, forstjóra Icelandair. Þá sagði hann útilokað að ríkið myndi grípa inn í rekstur WOW air.

 „Auðvitað hefur þetta áhrif á okkur þegar við erum að keppa við félög sem eru að selja flugsæti langt undir kostnaðarverði eins og við erum að sjá miðað við þær fréttir sem berast af félaginu [WOW air] þá þurfa kröfuhafar að taka á sig verulegt högg,“ sagði Bogi í samtali við Morgunútvarpið á Rás 2 í morgun.

„Þetta virðist gert með stuðningi opinberra aðila, opinberir aðilar virðast vera að fjármagna ósjálfbæran rekstur. Það er að mínu mati mjög slæmt og skekkir samkeppnisstöðu í flugi til og frá landinu. Svo að sjálfsögðu hefur þetta áhrif á okkur.“

Spurður hvort það gæti komið til þess að ríkið gripi inn í rekstur WOW air svaraði Bogi neitandi.

„Það finnst mér alveg útilokað vegna þess að það eru rúmlega 25 flugfélög að fljúga til landsins. Til lengri tíma þá mundi það alltaf hafa neikvæð áhrif að skekkja samkeppnisstöðu með þessum hætti.“