Forsvarsmenn Bláa lónsins munu segja upp 403 starfsmönnum frá og með næsta mánaðamótum til þess að bregðast við miklum samdrætti og óvissu í ferðaþjónustu. Vonir standa þó til þess að starfsfólkið verði ráðið að nýju þegar aðstæður breytast til hins betra. Þetta kemur fram í fréttatilkynningu frá félaginu.

Laun þeirra starfsmanna sem ekki fá uppsögn verða skert, mest hjá forstjóra og stjórn um 30 prósent, 25 prósent hjá framkvæmdastjórn og minna hjá öðrum.

Þrátt fyrir mikla óvissu hefur verið ákveðið að opna allar starfsstöðvar Bláa Lónsins á ný þann 19. júní næstkomandi, eftir tæplega þriggja mánaða lokun, en á því tímabili hefur fyrirtækið verið nær tekjulaust., eftir því sem fram kemur í tilkynningunni.

„Markmið þeirra aðgerða sem Bláa Lónið hefur nú gripið til er að gera fyrirtækinu kleift að komast í gegnum þá óvissutíma sem framundan eru.

Bláa Lónið, sem leiðandi fyrirtæki í íslenskri ferðaþjónustu, ætlar sér að taka þátt í viðspyrnu greinarinnar af fullum krafti þegar birta tekur að nýju,“ segir í tilkynningunni.