Björg­ólfur Jóhanns­son, for­stjóri Sam­herja, hefur sent starfs­fólki fyrir­tækisins bréf þar sem hann stappar í það stálinu og biður um skilning. Taka muni tíma að svara fyrir á­sakanir, hart sé sótt að fyrir­tækinu í fjöl­miðlum, en að­eins hafi verið sagt frá annarri hliðinni.

Í upp­hafi bréfsins segir Björg­ólfur það ekki gerast á hverjum degi að sótt sé að fyrir­tækinu af þeirri hörku sem sést hafi í fjöl­miðlum síðustu vikur. Fyrir­tækið hafi reynt að bregðast við á­sökunum á á­byrgan hátt, Þor­steinn Már Bald­vins­son hafi stigið tíma­bundið til hliðar og hins vegar hafi lög­manns­stofan Wik­borg Rein verið ráðin til að rann­saka málið.

„Nú þegar sjáum við að stór hluti þeirra á­sakana sem settar hafa verið fram á hendur Sam­herja á ekki við rök að styðjast. Á dögunum leið­réttum við rangar fréttir Ríkis­út­varpsins og Stundarinnar um fé­lagið Cape Cod FS. Eins og fram kom í til­kynningu á heima­síðu Sam­herja var Cape Cod FS aldrei í eigu Sam­herja eða tengdra fé­laga heldur var það í eigu starfs­manna­leigunnar JPC Ship­mana­gement sem Sam­herji átti í við­skiptum við til að manna á­hafnir á skipum í namibísku efna­hags­lög­sögunni.“

Full­yrðir Björg­ólfur þá næst að sú stað­reynd að Sam­herji hafi aldrei átt fé­lagið Cape Cod FS þýði í reynd að enginn fótur sé fyrir á­sökunum um peninga­þvætti sem settar hafi verið fram. Lög­menn Sam­herja hafi fundað með skatt­rann­sóknar­stjóra og héraðs­sak­sóknara og af­hent em­bættunum gögn um það. Þá hafi lög­menn Wik­borg Rein fundað með héraðs­sak­sóknara og átt í sam­skiptum við norsk yfir­völd.

„Birtir hafa verið 18.497 tölvu­póstar úr póst­hólfi Jóhannesar Stefáns­sonar frá árunum 2014-2016. Í ljós hefur komið að Jóhannes hefur ekki af­hent nema 42% af tölvu­póstum frá um­ræddu tíma­bili því í póst­hólfi hans voru 44.028 tölvu­póstar frá árunum 2014-2016. Það vekur ýmsar spurningar. Hvert var efni þeirra pósta sem ekki voru birtir? Hvers vegna voru þau tíma­bil sem um ræðir valin en ekki allt tíma­bilið? Sú stað­reynd að 58% af tölvu­póstunum voru aldrei birt hlýtur að vera um­hugsunar­efni fyrir þá sem telja að frá­sögn Jóhannesar Stefáns­sonar sé rétt og sann­leikanum sam­kvæm.“

Segir Björg­ólfur að Sam­herji vinni nú að því að greina fleiri á­sakanir á hendur fé­laginu heldur en þær sem nefndar séu hér fyrir framan. „Margar þeirra eru mjög al­var­legar en enn sem komið er hefur að­eins verið sagt frá annarri hlið þeirra í fjöl­miðlum. Það er erfitt fyrir fé­lagið og starfs­menn að sitja þegjandi undir þessu. Þið getið treyst því að við munum svara öllum þessum á­sökunum. Ég bið ykkur hins vegar um skilning því þetta mun taka tíma.“

Að síðustu segir hann málið hafa verið erfiðara við­fangs en Seðla­banka­málið.

„Þessi víð­tæka árás á fé­lagið, sem staðið hefur yfir undan­farnar vikur, hefur verið enn erfiðari við­fangs en sú sem við glímdum við í Seðla­banka­málinu. Við vitum hins vegar að sam­einuð munum við standa þetta af okkur. Ég vil að þið vitið að stjórn­endur Sam­herja eru ó­endan­lega þakk­látir fyrir ykkar fram­lag til fyrir­tækisins. Án ykkar væri fé­lagið ekki leiðandi í evrópskum sjávar­út­vegi. Við ætlum að gera allt sem við getum til að tryggja að svo verði á­fram.“

Bréf Björgólfs í heild sinni:

Það gerist ekki á hverjum degi að sótt sé að fyrirtækinu af þeirri hörku sem við höfum séð í fjölmiðlum síðustu vikur. Samherji reyndi að bregðast við ásökunum á ábyrgan hátt. Birtingarmyndir þess voru tvíþættar. Annars vegar steig Þorsteinn Már Baldvinsson forstjóri tímabundið til hliðar og hins vegar réð stjórn Samherja norsku lögmannsstofuna Wikborg Rein til að rannsaka málið.

Nú þegar sjáum við að stór hluti þeirra ásakana sem settar hafa verið fram á hendur Samherja á ekki við rök að styðjast. Á dögunum leiðréttum við rangar fréttir Ríkisútvarpsins og Stundarinnar um félagið Cape Cod FS. Eins og fram kom í tilkynningu á heimasíðu Samherja var Cape Cod FS aldrei í eigu Samherja eða tengdra félaga heldur var það í eigu starfsmannaleigunnar JPC Shipmanagement sem Samherji átti í viðskiptum við til að manna áhafnir á skipum í namibísku efnahagslögsögunni. Sú staðreynd að Samherji átti aldrei félagið Cape Cod FS þýðir í reynd að enginn fótur er fyrir ásökunum um peningaþvætti sem settar hafa verið fram vegna greiðslna til félagsins. Lögmenn Samherja hafa fundað með bæði skattrannsóknarstjóra og héraðssaksóknara og hafa afhent embættunum öll gögn um þetta. Þá funduðu lögmenn frá Wikborg Rein einnig með héraðssaksóknara og hafa verið í samskiptum við norsku efnahagsbrotadeildina Økokrim í Osló.

Birtir hafa verið 18.497 tölvupóstar úr pósthólfi Jóhannesar Stefánssonar frá árunum 2014-2016. Í ljós hefur komið að Jóhannes hefur ekki afhent nema 42% af tölvupóstum frá umræddu tímabili því í pósthólfi hans voru 44.028 tölvupóstar frá árunum 2014-2016. Það vekur ýmsar spurningar. Hvert var efni þeirra pósta sem ekki voru birtir? Hvers vegna voru þau tímabil sem um ræðir valin en ekki allt tímabilið? Sú staðreynd að 58% af tölvupóstunum voru aldrei birt hlýtur að vera umhugsunarefni fyrir þá sem telja að frásögn Jóhannesar Stefánssonar sé rétt og sannleikanum samkvæm.

Samherji er um þessar mundir að greina fleiri ásakanir á hendur félaginu en þær sem nefndar eru hér framar. Margar þeirra eru mjög alvarlegar en enn sem komið er hefur aðeins verið sagt frá annarri hlið þeirra í fjölmiðlum. Það er erfitt fyrir félagið og starfsmenn að sitja þegjandi undir þessu. Þið getið treyst því að við munum svara öllum þessum ásökunum. Ég bið ykkur hins vegar um skilning því þetta mun taka tíma.

Þessi víðtæka árás á félagið, sem staðið hefur yfir undanfarnar vikur, hefur verið enn erfiðari viðfangs en sú sem við glímdum við í Seðlabankamálinu. Við vitum hins vegar að sameinuð munum við standa þetta af okkur. Ég vil að þið vitið að stjórnendur Samherja eru óendanlega þakklátir fyrir ykkar framlag til fyrirtækisins. Án ykkar væri félagið ekki leiðandi í evrópskum sjávarútvegi. Við ætlum að gera allt sem við getum til að tryggja að svo verði áfram.