Bjarni Benediktsson, fjármálaráðherra, setur spurningamerki við nýlega herferð Alþýðusambandsins sem kynnt var undir formerkjunum „það er nóg til.“ Mörghundruð milljarða halli sé á ríkissjóði í kjölfar samdráttar síðasta árs. Því þurfi að halda rétt á spöðunum í efnahagsmálum, svo að hagvöxtur verði á ný.

Bjarni er til viðtals í sjónvarpsþætti Markaðarins á Hringbraut klukkan 19.30 í kvöld.

Ráðherrann segir í viðtalinu að kosningarnar í haust muni meðal annars snúast um hvernig eigi að takast á við efnahagsmál í kjölfar þeirrar djúpu kreppu sem reið yfir allan heiminn á síðasta ári:

„Ég held að þetta snúist að verulegu leyti um hvernig við bindum enda á þetta ástand sem við höfum verið að fást við. Höldum áfram að vaxa. Þar held ég að séu að takast á stjórnmálaskoðanir sem annars vega trúa meira á ríkisreksturinn, að við eigum að nota sjóði ríkisins til að jafna hlut allra og halda aftur af þeim sem vilja skara fram úr. Svo hins vegar þeir sem gera minna úr því að sumir nái miklum árangri á alþjóðavísu og vilja halda hér samkeppnishæfu umhverfi, meðal annars í skattalegu tilliti, svo að hjólin haldi áfram að snúast. Það er forsendan fyrir því að við getum risið undir velferðarkerfinu.“

Nýlega hratt Alþýðusamband Íslands af stað kynningarherferð í tengslum við dag verkalýðsins 1.maí, en yfirskrift herferðar ASÍ var „Það er nóg til.“ Bjarni vísar þeirri fullyrðingu ASÍ á bug:

„Ég sé því núna því haldið fram að það sé nóg til. Það var yfirskriftin í kringum 1.maí. Í fjármálaráðuneytinu sé ég að það er alls ekki nóg til. Það vantar 300 milljarða á ári, til þess að það sé nóg til. Til þess að það verði nóg til þá þarf að auka umsvifin og passa upp á að það verði til verðmæt störf,“ segir Bjarni.