Útgáfufélagið Birtingur tapaði 168 milljónum króna á árinu 2018. Félagið gaf út 4 blöð og tímarit á árinu; Mannlíf, Vikuna, Gestgjafann og Hús og híbýli, auk þess sem það hélt úti vefmiðlinum mannlif.is.

Í ársreikningi félagsins kemur fram að rekstrartekjur þess hafi numið tæpum 448 milljónum á árinu. Margir hafa kvartað undan rekstrarumhverfi fjölmiðla í dag en auk Birtings enduðu Árvakur og DV í tapi eftir árið 2018. Tap Árvakurs, útgefanda Morgunblaðsins, nam 415 milljónum króna og tap DV nam 240 milljónum króna.

Útgáfufélag Fréttablaðsins skilaði þá 39 milljóna króna hagnaði í fyrra, Stundin skilaði 10,5 milljóna króna hagnaði og útgáfufélag Viðskiptablaðsins hagnaðist um tvær milljónir króna.

Birtingur skilaði þá einnig tapi árið 2017, sem nam 149 milljónum króna. Þá gaf félagið einnig út tímaritið Nýtt líf.