Birkir Jóhannsson og Erlendur Davíðsson hafa tekið höndum saman hjá Birti Capital Partners. Birtir Capital Partners veitir fyrirtækjum og fjárfestum víðtæka og óháða fjármálaráðgjöf. Markmið félagsins er ávallt að auka verðmæti með skilvirkum hætti fyrir viðskiptavini og aðra haghafa og hafa á sama tíma jákvæð áhrif á umhverfi og samfélag. Þetta kemur fram í tilkynningu.

Birkir og Erlendur hafa komið að fjölda viðskipta með skráð og óskráð fyrirtæki og sameina nú krafta sína með fjölbreyttri reynslu og þekkingu á fjármálamörkuðum.

Birkir hefur yfir 15 ára reynslu á fjármálamörkuðum, síðast sem framkvæmdastjóri fjármála, reksturs og þróunar hjá Valitor. Áður starfaði Birkir m.a. í fyrirtækjaráðgjöf Arion banka og hjá Lögmönnum Höfðabakka. Birkir er með embættispróf í lögfræði frá Háskóla Íslands og meistaragráðu í fjármálum fyrirtækja frá Háskólanum í Reykjavík. Auk þess hefur Birkir lokið prófi í verðbréfaviðskiptum og til réttinda sem héraðsdómslögmaður.

Erlendur hefur yfir 15 ára reynslu á fjármálamörkuðum. Áður en Erlendur hóf störf hjá BCP starfaði hann m.a. sem forstöðumaður hlutabréfasjóða hjá Júpíter (nú Kvika eignastýring) og í fyrirtækjaráðgjöf Arion banka. Erlendur hefur kennt ýmis fjármálafög við grunn-, framhalds- og MBA-nám Háskóla Íslands. Erlendur er með B.Sc. gráðu í hagfræði, M.Sc. gráðu í fjármálum fyrirtækja og hefur lokið prófi í verðbréfaviðskiptum.