Bíó Paradís mun hefja starfsemi sína að nýju í haust eftir nokkurra vikna lokun annars vegar vegna kórónuveirunnar og hins vegar vegna óvissu um leigu á húsnæði kvikmyndahússins við Hverfisgötu. Loka átti kvikmyndahúsinu endanlega vegna þess að eigendur húsnæðisins kröfðust hærri leigu en í fyrri leigusamningi en nú hefur náðst samkomulag um leiguna.

Þetta kemur fram í tilkynningu frá mennta- og menningarmálaráðuneytinu og Reykjavíkurborg en þar er tekið fram að einnig hafi verið gerðar uppfærslur á starfssamningum Bíó Paradísar við bæði ríkið og borgina. Stefnt er að því að ná að opna bíóið á ný um miðjan september næstkomandi þegar Bíó Paradís á 10 ára afmæli.

Náðu loks saman um leigu

Heit umræða skapaðist um háar leigukröfur eigenda húsnæðisins í vor þegar greint var fyrst frá málinu. Bíó Paradís neyddist þá til að segja upp öllu starfsfólki sínu og loka starfsemi sinni eftir að hafa staðið frammi fyrir því að þurfa að greiða þrefalt eða fjórfalt hærri leigu fyrir aðstöðuna.

„Vegna aðstæðna þurfti Bíó Paradís að segja upp öllu starfsfólki síðastliðið vor, en þá höfðu aðilar ekki náð saman um leigukjör og nauðsynlegar endurbætur og viðhald húsnæðisins til lengri tíma. Það hefur nú tekist, eftir að málsaðilar slógu af ítrustu kröfum sínum og mættust á miðri leið. Áframhaldandi starfsemi í kvikmyndamenningarhúsinu við Hverfisgötu hefur því verið tryggð,“ segir í tilkynningunni.

Hrönn Sveinsdóttir framkvæmdastjóri Bíós Paradísar segist himinlifandi með niðurstöðuna. „Við viljum þakka öllu stuðningsfólki Bíós Paradísar fyrir stuðninginn, en þó sérstaklega mennta- og menningarmálamálaráðuneytinu, Reykjavíkurborg og eigendum hússins, félaginu Karli Mikla ehf. Við getum ekki beðið eftir að fara að sinna kvikmyndamenningunni aftur og halda áfram að færa landsmönnum öllum fjölbreytta kvikmyndaupplifun í betri aðstöðu," segir Hrönn.

„Þetta er sannkallað gleðiefni,“ segir Dagur B. Eggertsson borgarstjóri. „Við erum með þessu að tryggja að Bíó Paradís sinni áfram þeirri mikilvægu menningarstarfsemi sem hún hefur sinnt undanfarin áratug. Bíóið er sannkölluð vagga kvikmyndamenningar í Reykjavík og á landinu öllu. Þá er ótrúlega mikilvægt að Hverfisgatan verði áfram heimili kvikmyndanna og haldi áfram að sjá kvikmyndaþyrstum gestum fyrir fjölbreyttu framboði af allskonar bíómyndum frá öllum heimshornum.“

Lilja Alfreðsdóttir, mennta- og menningarmálaráðherra segist þá einnig ánægð með málið: „Íslensk kvikmyndamenning stendur í miklum blóma og það er hlutverk okkar að vökva vel jarðveginn sem hún sprettur úr. Í því samhengi gegnir Bíó Paradís mikilvægu hlutverki, í samstarfi við atvinnugreinina, Kvikmyndamiðstöð Íslands og Kvikmyndasafn Íslands. Við ráðgerum að kynna með haustinu heildstæða kvikmyndastefnu fyrir Ísland, þar sem m.a. er gert ráð fyrir rekstri öflugs kvikmyndamenningarhúss. Starfsemi Bíós Paradísar fellur vel að því markmiði og ég hlakka til að sjá dyr þess opnast á ný.“