Bílgreinasambandið og SVÞ - Samtök verslunar og þjónustu hófu í gær samstarf. Markmiðið er að efla þjónustu við félagsmenn í samskiptum við stjórnvöld, í lögfræðilegum álitamálum og í fræðslu- og menntunarmálum ásamt því að styrkja rekstur beggja samtaka. Þetta kemur fram í tilkynningu.

Rekstrarumhverfi fyrirtækja í bílgreininni og í verslun og þjónustu verður sífellt flóknara með auknum kröfum af margvíslegu tagi sem m.a. leiða til aukinna samskipta við stjórnsýsluna. Samvinna eflir þessi samskipti, eykur þjónustu og upplýsingagjöf og er til mikillar hagræðingar fyrir félagsmenn. Hún er ekki síður hagræðing fyrir stjórnsýsluna sem þarf þá að taka við færri umsögnum sem oftar en ekki eru efnislega sambærilegar. Sífellt hraðari tækniþróun kallar á aukna fræðslu og menntun sem samtökin geta eflt enn frekar með samvinnu.

María Jóna Magnúsdóttir, framkvæmdastjóri Bílgreinasambandsins, segir að það séu samlegðaráhrif á fjölmörgum sviðum sem geri samtökunum kleift að vinna enn betur fyrir félagsmenn sína.“ Samskipti við stjórnsýsluna verða markvissari og öflugri, félagsmenn Bílgreinasambandsins munu njóta góðs af aðgengi að fræðsludagskrá SVÞ, enda er eðli bílgreinarinnar í raun verslun og þjónusta, og hagræðing í rekstrarkostnaði samtakanna er augljós.“

Andrés Magnússon, framkvæmdastjóri SVÞ, segir að hagsmunir þessara greina fari að langmestu leyti saman. „Í ljósi þess fögnum við þessum samstarfi og vonumst til að geta þróað það áfram enn frekar.”