Benedikt Ólason hefur verið ráðinn framkvæmdastjóri flugrekstrar (COO) hjá Niceair. Benedikt hefur yfir 20 ára reynslu í flugi, lengst af sem flugstjóri, þjálfunarflugstjóri og Airbus-flotastjóri hjá Air Atlanta.

Þorvaldur Lúðvík Sigurjónsson, framkvæmdastjóri Niceair, segist mjög glaður að fá Benedikt til liðs við hópinn og er bakgrunnur hans og fjölbreytt reynsla mjög góð viðbót við sterkan hóp.

“Það er mjög mikilvægt fyrir ungt fyrirtæki að fá til sín svo mikla og farsæla reynslu úr alþjóðlegu starfsumhverfi,” segir Þorvaldur.

Niceair hefur verið starfrækt síðan í júní á þessu ári og flýgur til Kaupmannahafnar og Spánar frá Akureyri. Fleiri áfangastaðir eru í bígerð fyrir 2023, en verkefni félagsins er fyrst og fremst að auka aðgengi erlendra ferðamanna að Norður- og Austurlandi auk þess að þjónusta íbúa þeirra landshluta.

“Ég hlakka mikið til að taka þátt í uppbyggingu og eflingu starfsemi Niceair á starfssvæði þess á Norður- og Austurlandi. Fyrirtækið er ungt og mikil áskorun að taka þátt í mótun þess á fyrstu stigum.” segir Benedikt Ólason.