Good Good hefur ráðið Belindu Navi í starf markaðsstjóra með aðsetur í höfuðstöðvum fyrirtækisins í Reykjavík. Belinda Navi flutti búferlum frá Los Angeles til Reykjavíkur til að starfa fyrir Good Good og hefur þegar hafið störf. Þetta kemur fram í tilkynningu.

Belinda Navi er með MBA gráðu frá INSEAD og B.A. gráðu í bókmenntafræði frá Brown University. Hún starfaði áður sem markaðsráðgjafi fyrir viðskiptavini á borð við Amobee Inc, Belkin International og SunAsia Energy Inc og sem markaðs- og þróunarstjóri fyrir WePlay Networks.

Belinda Navi er með MBA gráðu frá INSEAD og B.A. gráðu í bókmenntafræði frá Brown University.
Mynd/Aðsend

„Við erum virkilega ánægð að fá Belindu til að stýra markaðsstarfi okkar og sókn Good Good inn á alþjóðlega markaði. Ráðning hennar mun styrkja markaðsstarf okkar á heimsvísu, sér í lagi í Norður Ameríku þar sem við erum þegar í mikilli sókn. Belinda er með yfirgripsmikla reynslu sem mun nýtast Good Good vel við vörumerkjaþróun, markaðsrannsóknir og við að greina ný markaðstækifæri,“ segir Garðar Stefánsson, framkvæmdastjóri hjá Good Good.

Good Good er íslenskt sprotafyrirtæki sem sérhæfir sig í þróun og framleiðslu á matvælum án viðbætts sykurs. Vöruframboðið samanstendur m.a. af sultum, hnetu- og súkkulaðismyrju, sætuefnum, stevíu-dropum, sýrópi og keto-börum.